«Ordabasy» óz alańynda «Kaspııden» basym tústi

ASTANA. QazAqparat – Fýtboldan Premer-lıga komandalary arasyndaǵy el birinshiliginde 1-týrdyń alǵashqy oıyny aıaqtaldy, dep habarlaıdy QazAqparat tilshisi.

El birinshiliginiń alǵashqy oıyny «Ordabasy» (Shymkent) men «Kaspıı» (Aqtaý) komandalary arasynda ótti.

Shymkentte ótken kezdesýde komandalar bir-biriniń qaqpasy mańynda jıi boı kórsetti. Nátıjesinde, 6-mınýtta alań ıeleri sapynan Baýyrjan Islamhan aıyp dobyn oryndaý arqyly dop dodasynyń alǵashqy golyn soqty. Osylaısha, ol eki jyldyq úzilisten keıin el birinshiliginde resmı matchta alǵashqy goldyń avtory atandy.

Aıta ketsek, 2020 jyldyń qyrkúıek aıynda Birikken Arab ámirliginiń «Al-Aın» komandasy quramynda Azııa chempıondar lıgasyndaǵy kezekti oıynynan keıin onyń tapsyrǵan dopıng-synamasy oń nátıje kórsetip, eki jylǵa úlken fýtboldan shettetilgen edi. Jaza merzimi 2020 jyldyń qarasha aıynda aıaqtaldy.

Búgingi kezdesýde alań ıeleri qatarynan Ashat Taǵybergen 49, Bobýr Abdıholıkov 66-mınýttarda esepti ústemeleı tústi.

Oǵan 71-mınýtta «Kaspıı» oıynshysy Georgıı Pantsýlaıa bir golmen jaýap qaıyrdy.

Osylaısha, «Ordabasy» alǵashqy týrda qarsylasynan 3:1 esebimen basym tústi.

Sondaı-aq, búgin «Jetisý» (Taldyqorǵan) men «Aqtóbe», «Tobyl» (Qostanaı) men «Aqsý» (Pavlodar oblysy), «Astana» men «Shahter» (Qaraǵandy) kezdesedi.

Erteń, 5 naýryzda «Maqtaral» (Túrkistan oblysy) men «Oqjetpes» (Kókshetaý), «Qaırat» (Almaty) pen «Atyraý», «Qaısar» (Qyzylorda) men «Qyzyljar» (Petropavl) sheberlik baıqasady.