«Ordabasy» men «Aqtóbe» teń tústi

ASTANA. QazAqparat - Fýtboldan Premer-lıga komandalary arasyndaǵy el birinshiliginiń 5-týry máresine jetti, dep habarlaıdy QazAqparat tilshisi.

Besinshi týrdy «Ordabasy» (Shymkent) men «Aqtóbe» komandalary túıindeıdi.

Týrnır kestesinde qatarlas kele jatqan qos komanda úshin búgin jeńiske jetýdiń mańyzy zor edi.

Bıyl ekeýi de bas júldeden úmitker ujymdar qatarynda sanalady. Sol sebepti olar negizgi qarsylastarynyń birin tize búktirýge tyrysty.

Kezdesý tartysty jaǵdaıda órbidi. Komandalar bir-biriniń qaqpasy mańynda jıi boı kórsetti. Birinshi kezeńde tablodaǵy esepke ózgeris engen joq.

Ekinshi kezeńde de komandalar jıi shabýyl uıymdastyrdy.

Nátıjesinde 65-mınýtta «Aqtóbe» oıynshysy Ýgo Vıdemon qarsylas qaqpasynan sańylaý tapsa, oǵan «Ordabasy» sapynan Sergeı Malyı 96-mınýtta bir golmen jaýap qaıyrdy.

Komandalar 1:1 esebine qanaǵat bildirdi.

Aıta ketsek, búgin budan buryn «Qaırat» óz alańynda «Jetisýǵa» - 2:3, «Tobyl» «Astanaǵa» - 0:1 esebimen ese jiberdi.

Eske salsaq, 8 sáýirde «Oqjetpes» «Aqsýdy» 3:0, «Maqtaral» «Kaspııdi» 3:1, «Qyzyljar» «Atyraýdy» 1:0, «Qaısar» «Shahterdi» 2:1 esebimen tize búktirdi.

Endi altynshy týr oıyndary 15 jáne 16 sáýir kúnderi ótkiziledi.