Ordabasy aýdanynda ıgerilmegen 2300 gektar jer memleketke qaıtaryldy

ORDABASY. QazAqparat – Túrkistan oblysy Ordabasy aýdanynda aýyl sharýashylyǵy baǵytyndaǵy ıgerilmegen 2300,2 gektar jer memlekettiń qoryna qaıtaryldy. Bul sharalar eki jyl ishinde júrgizilgen túgendeý jumystarynyń nátıjesinde iske asqan, dep habarlaıdy QazAqparat tilshisi.

Qazirgi tańda aýdan ákimi Nurbol Turashbekov tıisti sala mamandaryna túgendeý jumystaryn áli de shırata túsý kerektigin tapsyrdy.

Osy tapsyrmaǵa sáıkes, Tórtkúl aýyl okrýginen memlekettiń muqtajy úshin «Batys Eýropa - Batys Qytaı» halyqaralyq kólik dálizine arnalǵan jer ýchaskelerine memlekettik sáıkestendirý aktileri alynyp, rásimdeldi.

Bul jumystar «KazAvtoJol» AQ Túrkistan oblystyq fılıaly tarapynan atqarylǵan.

Sondaı-aq, avtomagıstraldiń qorǵaý aımaǵyna enbegen jer ýchaskelerin aýdanǵa qaıtarý jumystary júrgizilgen.

Búginde jalpy kólemi 131,4 gektar bolatyn 11 jer ýchaskesiniń ıgerilmegeni belgili boldy.

Jer paıdalanýshylaryna tıisti nusqama taratylyp, jer ýchaskesin 2 jyl qatarynan ıgermegen jaǵdaıda sot tártibimen aýdandyq jer qoryna qaıtarylatyny eskertildi.