Oraza aıt qazaqstandyqtardyń yntymaǵyn arttyra túsetin berekeli meıram - Ǵ.Telebaı

ASTANA. QazAqparat - Oraza aıt qazaqstandyqtardyń yntymaǵyn arttyra túsetin berekeli meıram. Búgin Astanadaǵy Ál-Ǵanı meshitinde Oraza aıt merekesine oraı ótken «Úlken el-úlken otbasy» atty qaıyrymdylyq sharasyna qatysty «Qoǵamdyq kelisim» mekemesi dırektorynyń orynbasary Ǵazız Telebaı osylaı málim etti. Eske salaıyq, qaıyrymdylyq aktsııasyn ótkizýdi Qazaqstan halqy Assambleıasy men QR musylmandary dinı basqarmasy qoldap, «Astana qalalyq ózbek etnomádenıet ortalyǵy» muryndyq bolǵan.

Jýrnalısterge bergen suhbatynda Ǵazız Telebaı Oraza aıtynyń máni men mańyzyna toqtala kele, ısi musylman úshin qasıetti sanalatyn ulyq merekeniń qaıyrymdylyq pen izgilikti arttyrýǵa kóp septik bolatynyn jetkizdi.

«Bul elimizdegi qazaqtardyń ǵana emes, barsha qazaqstandyqtardyń meıramy. Óıtkeni bundaı meıram beıbitshilikke jurtty shaqyryp, birlikke úndeıdi. Búgin ózbek etnomádenı ortalyǵynyń uıymdastyrýymen Ál-Ǵanı meshitinde ótken bul bastama shyndyǵynda kópultty qazaqstandyqtardyń yntymaǵyn arttyryp, birige túsýge jaǵdaı jasaıdy dep sanaımyn», - dedi Ǵ.Telebaı.

Onyń aıtýynsha, bul meıram elimizdegi barlyq ult ókilderi úshin ortaq shara. Óıtkeni adam boıyndaǵy izgilik pen meıirbandyq ultqa, dinge bólinbeıdi.

«Jalpy, osyndaı aktsııalar arqyly Qazaqstan óziniń barsha azamattarynyń qundylyqtary men maqsattary ortaq ekendigin bar álemge pash etedi», - dedi Ǵ.Telebaı.