Oraza, aýyzashar, sadaqa boıynsha 109 nómiri arqyly keńes alýǵa bolady

NUR-SULTAN. QazAqparat – Ramazan aıy kezinde elorda turǵyndary orazaǵa qatysty dinı jáne medıtsınalyq saýaldar boıynsha, sadaqa berý jáne aýyzashar jetkizý máseleleri boıynsha 109 nómirine habarlasyp, keńes alady, dep habarlaıdy QazAqparat tilshisi.

Bul týraly Nur-sultan qalasynyń Din isteri basqarmasynyń basshysy Nurdáýlet Álmuhanov málim etti.

«Elorda meshitterindegi sanıtarlyq-epıdemıologııalyq jaǵdaıǵa baılanysty dástúrli túrde túngi namazdar, taraýyq namazdar men juma namazdary ótkizilmeıtini týraly habarlaǵym keledi. Sondaı-aq aýyzashardy ujymdyq túrde ótkizýden bas tartýdy suraımyz», - dedi basqarma basshysy.

Onyń sózinshe, Nur-Sultan qalasynyń Din isteri basqarmasy memlekettik organdarmen jáne Qazaqstan musylmandary dinı basqarmasynyń fılıaldarymen birlesip Ramazan aıyna tıisti daıyndyq jumystaryn júrgizýde.

«109 ortalyqtandyrylǵan nómiri arqyly elorda turǵyndary men qonaqtary Ramazan aıyn ótkizý jáne jalpy din máseleleri boıynsha óz suraqtaryn qoıa alady. Qurmetti elorda turǵyndary men qonaqtary, sanıtarlyq-epıdemıologııalyq qaýipsizdik sharalaryn saqtaýdy, shekteý sharalaryna túsinistikpen qaraýdy suraımyz», - dedi Nurdáýlet Álmuhanov.

Osy sharada Nur-Sultan qalasynyń bas ımamy Ramazan aıynda meshitke kelýdiń tártibin túsindirdi.

Eske salsaq, osy brıfıng barysynda elordalyq eriktiler aýyzashar qorjynyn jetkizýge kómektesetini aıtyldy.