Oraza – 2022: Jarapazandy jatqa aıtýdan jarys ótedi

NUR-SULTAN. QazAqparat – Bıyl Ramazan aıynda jarapazan jyryn jatqa aıtýdan saıys uıymdastyrylmaq. Bul týraly Qazaqstan musylmandary dinı basqarmasynyń tóraǵasy, elimizdiń bas múftıi Naýryzbaı qajy Taǵanuly málim etti, dep habarlaıdy QazAqparat tilshisi.

«Jarapazan – qasıetti Ramazan aıynyń kelgenin habarlaıtyn, halyqty izgilikke úndeıtin jyr. Jarapazan aıtý – dástúrimizde bar jaqsy úrdistiń, jaqsy ǵuryptyń biri. Qazaqstan musylmandary dinı basqarmasy Ramazan aıynda jarapazan jyryn jatqa aıtýshylar arasynda arnaıy saıystar uıymdastyrýdy josparlap otyr. Osy rette ıgi dástúrimizdi buqaralyq sıpatta nasıhattaý úshin aqparat quraldary ókilderin dinı basqarmanyń izgi bastamalaryna aqparattyq qoldaý kórsetýge úndeımin», - dedi Naýryzbaı qajy Taǵanuly OKQ-de onlaın ótken brıfıngte.

Onyń aıtýynsha, elimizde ata-babalarymyzdyń san ǵasyrdan beri ustanyp kelgen dinı joly – ıhsan ilimi jan-jaqty nasıhattalyp keledi.

«Alla Taǵala qasıetti Ramazan aıynda ustaǵan orazamyzdy qabyl etip, mol saýapqa kenelgen pendelerinen etkeı. Jaratýshy Jabbar Iemiz elimizge amandyq, jerimizge tynyshtyq berip, táýelsizdigimizdi baıandy etkeı», - deıdi ol.

Buǵan deıin habarlaǵanymyzdaı elordada basqarma janynan dinı aqparat berý ortalyǵy ashyldy.

Aıta keteıik, bıyl Ramazan aıy 2 sáýirde bastalyp, 1 mamyrda aıaqtalady.