ORAZA - 2017: Mán bererlik málimetter

ASTANA.QazAqparat - Jamaǵat nazaryna Qazaqstan musylmandary dinı basqarmasynyń málimetteri negizinde bıylǵy Oraza aıynda mán berer málimetterdi usynamyz.

- Bıylǵy Ramazan aıy 27 mamyrda bastalyp, 24 maýsymda aıaqtalady, musylmandyq aı kúntizbesi boıynsha Oraza 29 kún.

- Pitir-sadaqany Ramazan aıynyń basynan Aıt namazyna deıin berýge bolady. Elimiz boıynsha ár adamǵa 300 teńge.

- Pitir-sadaqadan túsken qarajat esebinen múgedekter men qarttarǵa, jesir áıelder men jetimderge, áleýmettik turmysy tómen otbasylarǵa qaıyrymdylyq kómek kórsetiledi.

- Qasıetti «Qadir túni» maýsymnyń 21-inen 22-ine qaraǵan túni bolady. Qadir túninde meshitterde tańǵa deıin rýhanı baǵdarlamalar uıymdastyrylady. Ýaǵyz aıtylyp, Quran oqylyp, jamaǵatpen duǵa jasalady.

- 25 maýsym (jeksenbi) kúni Oraza aıt meıramy bastalady. Oraza aıt kúnderi dástúrli túrde meshit aýlalaryna qazaq úıler tigilip, jamaǵat arasynda ulttyq sport túrlerinen (asyq atý, arqan tartý, qol kúres, gir tasyn kóterý, t.b.) jarystar uıymdastyrylady dep kútilýde.

- Jolaýshylarǵa, júkti, etekkiri kelgen nemese omyraýda balasy bar áıelderge, naýqas jandarǵa Oraza ustaý - paryz emes.

- Saparda júrgenderge Oraza ustamaýǵa bolady. Biraq basqa kúnderde sanyn toltyryp, aýyz bekitedi. Eger sapar qıyndyq týǵyzbasa, abzaly - aýyz bekitý.

- Ramazan aıy qarsańynda Bas múftı Erjan qajy Malǵajyuly musylman qaýymyna Úndeý joldap, halqymyzdy orazanyń ár kúninde jaqsylyq jasap, qaıyrymdylyq is-sharalarǵa atsalysýǵa shaqyrdy. Sonymen qatar, kásipkerlerdi turmysqa qajetti zattarǵa jeńildik jasaýǵa, jamandyqtyń bastaýy bolǵan araq-sharap satpaýǵa úndedi.

-Taraýıh namazdarynan keıin jamaǵat úshin meshit aýlalaryna arnaıy avtobýstar qoıylyp, turǵyndar tegin jetkiziledi.