Oralmandarǵa azamattyq berý úderisin jedeldetý qajet - G. Orazbaeva

ASTANA. 27 qarasha. QazAqparat /Qanat Mámetqazyuly/ -Qazaqstanǵa keletin etnıkalyq otandastarǵa azamattyq berý máselesin jedeldetip sheshý kerek. Búgin elordada EQYU aıasyndaǵy Sholý konferentsııasynyń «Mıgranttarǵa qatysty tózimsizdik» sessııasynda sóz sóılegen Aqmola oblysy «Jábirlenýshilerge kómek ortalyǵy» qoǵamdyq qorynyń ókili Gúlnara Orazbaeva osylaı málim etti.

«Mıgratsııa - jahandaný elementteriniń biri. Sondyqtan bul baǵyttaǵy problemalardy ýaqytyly sheshý qajet. Al Qazaqstannyń elordasynda atalǵan máseleniń EQYU sheńberinde talqylanýy elimizdiń toleranttyǵyn bildiredi. Sonymen qatar, 1991 jyldan beri Qazaqstan 1 mln.-nan astam etnıkalyq qazaqtardy qabyldap, olardy jumyspen qamtýda, ornalastyryp, beıimdeýde úlken sharalar atqarýda. Alaıda, bul baǵytta sheshimin tabýdy qajet etetin birqatar kemshilikter baıqalýda. Máselen, biz oralman mártebesin ıelengen azamattarǵa Qazaqstan azamattyǵyn berý úderisin jedeldetýdi usynamyz. Bul rette azamattardyń qaı elden kelgenine qaramastan, tipti sol elmen kelisimsharttardyń bolý-bolmaýyna qaramastan, ondaı úderisti shapshań qabyldaýdy oń sheshý kerek», dedi G. Orazbaeva. Onyń aıtýynsha, oralmandardy beıimdeýge qatysty birqatar jaǵdaı jiti nazar aýdarýdy qajet etedi. Máselen, qoǵamdyq uıym ókiliniń aıtýynsha, oralmandar úshin tildik kedergimen qosa, jazý máselesine qatysty beıimdeý sharalary tereń júrgizilýi shart.