Oralmandar qonystanatyn aımaqtardy ózderi tańdaıdy

ASTANA. QazAqparat - Elge oralýǵa bel býǵan qandastarymyz úshin jaǵymdy jańalyq. QR Úkimeti ózge memleketterden oralǵan etnıkalyq qazaqtardyń Qazaqstanda emin-erkin qonystanýyna múmkindik beretin qaýly qabyldady.

«Halyqtyń kóshi-qon máseleleri týraly» Zańnyń kóptegen aspektileri qaıta qarastyrylyp, jeńildetildi. Máselen, bunyń aldynda oralmandardy jaıǵastyrý aımaqtaryn Úkimet sheshetin. Ózge ólkege kóshkisi kelgen qandastarymyz ózderiniń tólem qabiletterin rastaý kerek bolǵan. Endi oralmandar qonystanatyn aımaqtardy ózderi tańdaıdy.

QR Úkimeti eńbek resýrstary jetkiliksiz aımaqtardy anyqtap, sondaı óńirlerde turýǵa nıet tanytqan qandastarǵa áleýmettik paketter usynady. Osylaısha, yntalandyrý arqyly qonystandyrý máselelerin retteý tetikteri qarastyrylǵan.

Táýelsizdiktiń bastapqy jyldarynan-aq Qazaqstannyń negizgi kóshi-qon saıasaty syrt memleketterde turyp jatqan etnıkalyq qazaqtarǵa elge qaıtadan oralýǵa múmkindik jasaý bolatyn. Keıingi jyldary osy is odan ári kúsheıe tústi. Onyń ishinde kóshi-qon saıasatyn jetildirý, qandastarymyzdyń áleýmettik qorǵalýyn qamtamasyz etý máseleleri qolǵa alynyp keledi.

Resmı derekter boıynsha, Qazaqstanǵa oralǵan repatrıanttardyń sany 750-850 myń kóleminde. Olardyń aldynda úlken máseleler tur. Onyń ishinde jumyspen jáne baspanamen qamtamasyz etý, tildik kedergiler, azamattyq alý syndy ózekti túıtkilder bar.