«Oralman» fılminiń eýropalyq tusaýkeseri Germanııada ótedi

ASTANA. QazAqparat - Rejısser Sábıt Qurmanbekovtiń «Oralman» fılmi ústimizdegi jyly qarashanyń 9 - 19 kúnderi ótetin 66-shy Halyqaralyq Mangeım-Haıdelberg kınofestıvalinde baq synaıdy. Bul jaıynda Sháken Aımanov atyndaǵy «Qazaqfılm» AQ baspasóz qyzmetiniń málimetinde aıtylǵan, dep habarlaıdy QazAqparat.

Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen atalmysh fılm týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz týraly baıandaıdy.

«Fılm Germanııanyń festıvaline qatysqaly jatqany úshin qýanyshtymyn. Meniń týǵan aýylym Aldabergende nemister kóp turatyn. Synyptastarymnyń jartysy nemister edi. Olardyń kóbi 80-jyldardyń aıaǵynda tarıhı otandaryna oraldy. Olar da atamekenderinde túrli qıyndyqqa tap boldy. Sondyqtan da repatrıanttar taqyryby - búkil álemde ózekti», - deıdi Sábıt Qurmanbekov.

Halyqaralyq Mangeım-Haıdelberg (International Filmfestival Mannheim-Heidelberg)kınofestıvali 1952 jyldan beri ótkizilip keledi. Festıval kınoındýstrııanyń kásibı mamandaryna jáne kınosúıer qaýymǵa arnalǵan.  Jyl saıyn festıvalge 500 kásibı maman men 60 myń kórermen qatysady. Bul óz kezeginde kınofestıvaldiń aýqymy keń jáne Germanııadaǵy eń iri festıvalderdiń biri ekenin dáleldeıdi. Festıval aıasynda rejısserlermen, akterlermen jáne prodıýserlermen kezdesýler uıymdastyrylady.

Festıval kelesi atalymdar boıynsha úzdikterdi anyqtaıdy: «Úzdik fılm», «Arnaıy júlde», «Jetistikteri úshin arnaıy júlde». Negizgi konkýrstyq júldeden basqa festıval aıasynda kınoteatr ıegerleri jáne Halyqaralyq kınobaspasóz federatsııasy (FIPRESSI) ózderiniń marapattaryn tabystaıdy. Sondaı-aq kórermender kózaıymy júldesi de beriledi.  

Bıyl festıvaldiń bas júldesine otandyq kartınadan basqa 21 fılm talasqa túsedi. Osy oraıda Frantsııa, Argentına, Danııa, Estonııa, Islandııa, Úndistan, Iran, Izraıl, Túrkııa, AQSh, Germanııa  jáne basqa elderden kartınalar usynylyp otyr.

Jeńimpazdar esimin 2017 jyly 19 qarasha kúni festıvaldiń jabylý saltanatynda jarııalaıdy.

Aıta ketelik jaıt, Bashqurtstanda ústimizdegi jyldyń jeltoqsanynda ótetin IV Halyqaralyq «Kúmis Aqbozat» kınofestıvaliniń ashylý saltanaty «Oralman» fılmimen ashylady.

Esterińizge sala ketsek, «Oralman» kórkem fılmi osy jyldyń basynda Irannyń astanasy Tegeranda ótken  35-shi halyqaralyq Fadjr kınofestıvali men XIII Halyqaralyq «Eýrazııa» kınofestıvaliniń Bas júldesin jeńip alǵan bolatyn.  Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq, kartına Italııada ótken HH Halyqaralyq «Religion Today» kınofestıvalinde «Úzdik fılm» nomınatsııasynda jeńiske jetip, táýelsiz SIGNIS qazylar alqasynyń arnaıy júldesin ıemdendi.