Oralhan Bókeıdiń mýzeı úıi memleket menshigine beriletin boldy
Shyǵys Qazaqstan oblysy Katonqaraǵaı aýdanyndaǵy Shyńǵystaı aýylynda kórnekti jazýshy Oralhan Bókeıdiń jas shaǵy ótken mýzeı-úı bar. Búginge deıin Bókeı áýletiniń qara shańyraǵy qujat júzinde jekeniń menshiginde bolyp keldi. Keıingi jyldary jeke menshiktegi nysandy kútip ustaýǵa bıýdjetten aqsha bólý zańǵa tompaq bolǵandyqtan, mádenı-tarıhı nysannyń keteýi ketip bara jatqany týraly másele jıi kóterilip júrgen. Sol másele ótken aıda sheshimin taýyp, mýzeı-úı memleket balansyna beriletin bolypty.
Bul málimetti Katonqaraǵaı aýdanynyń ákimi Dildar Qalıqan rastady.
«Nysandy «Katonqaraǵaıdy turaqty damytý qory» satyp aldy. Demek, qazir mýzeı-úı sol qordyń balansynda tur. Qor sol úshin 10 mln teńge tólep, satyp aldy. Aqpan aıynda úı ıesi kelip, kiltti tabystady. Kelisimshart jasalyp, notarıýs bekitti. Endi úıdi qalpyna keltirý jumystaryn bastaımyz. Aýlasyn, úıdiń ishin, bárin qalpyna keltirý kerek. Odan keıin jospar boıynsha oblystyq ólketaný mýzeıiniń bir fılıaly bolyp ashylady. ıAǵnı, tolyqtaı memleket menshigine beriledi. Ol úshin mýzeı qorynda myńnan astam derek bolý kerek degen sııaqty talaptary bar eken. Qazir sonyń bári jınastyrylyp jatyr.
Osy jumystyń bári oıdaǵydaı bitse, mamyr aıyna qaraı nysan kelýshilerge esigin ashatyn shyǵar. Onyń ústine aýlasynda turǵan jazýshy músinin jańalasaq dep otyrmyz. Tapsyrys berilgen, jasatyp jatyrmyz. Nysandy qalpyna keltirý jumystary qandaı qarajatqa atqarylatynyn da qarastyryp jatyrmyz», - dedi aýdan ákimi.
Jazýshynyń týǵan qaryndasy Ǵalııa Bókeıqyzy da ákimdiktiń nysandy kútip ustaý týraly ustanymyn qoldaıtynyn aıtty.
«Osy másele boıynsha aýdan ákimimen eki ret aqyldastym. Meniń basty qoıǵan talabym – mýzeı úı oblystyń balansynda bolýy kerek edi. Óıtkeni aýdan balansynda bolǵan kezde qaraýsyz qalǵan jaıttar bolǵan. Aýdanǵa rýhanııatty túsinetin adam basshy bop kelse, mýzeıge aqsha bólinedi de, rýhanııattan alys adam kelse, aqsha bólinbeı qalady. Bul talabyma ákimdik kónip otyr. Nysan oblystyń nysanynda bolǵandyqtan, oblystyq bıýdjetten qarjylandyrylady. Mýzeıdiń shtat sany týraly talabym da qoldaý tapty. Aýladaǵy músini oǵashtaý bolatyn. Ony da jańalaýǵa ýáde berip otyr. Osynyń bárin eskerip, qara shańyraǵymyzdy memleket balansyna berýge kelisim berdim. Úıdegi eksponattar men qujattardy, óz qolymda bolǵan muranyń bárin qaǵazǵa tizip, arnaıy akt jasap, resmı tabystadym», - dedi ol.
Eske salaıyq, bıyl Oralhan Bókeıdiń týǵanyna 80 jyl tolady.