Oralǵa bet alǵan ushaqta júregi ustaǵan jolaýshyǵa kómektesken dárigerdiń kim ekeni anyqtaldy

<p>ORAL. KAZINFORM &nbsp;- 2 naýryz kúni Almatydan Oralǵa ushqan Air Astana áýe kompanııasynyń KS 881 reısinde júregi ustaǵan jolaýshyǵa járdem bergen dárigerdiń kim ekeni anyqtaldy.</p>

Kýágerlerdiń sózine qaraǵanda, jas jigittiń baǵyna oraı bortta dáriger bolǵan.

Surastyra kelgende, ol joǵary sanatty dáriger-terapevt Ulbolsyn Sabırova bolyp shyqty. Eńbek ótili – 29 jyl. Reseıdiń Samara oblysynan kóship kelgen. 2023 jyldan beri Qazaqstanda turyp jatyr.

Ol atalmysh ushaq bortynda naýqasqa shuǵyl járdem bergenin rastady.

«Biz qaıda bolsaq ta, dárigermiz. Sondyqtan jany qysylǵan adamǵa qolushyn sozý – boryshymyz. Oqıǵanyń búge-shigesine deıin aıtpaı-aq qoıaıyn. Qaıta barlyq járdemdesken adamdarǵa rızashylyǵymdy bildirgim keledi. Ásirese, qysyltaıań sátte ushaq ekıpajy óz qyzmetterin saýatty atqardy. Bortserik, stıýardessalar da aıanyp qalǵan joq. Sonyń nátıjesinde jasy qyryqqa jaqyndaǵan jas er adamdy Almaty áýejaıynda jedel járdem qyzmetkerlerine tapsyrdyq. Men qazir Oral qalasyndamyn. Osynda jumysqa ornalasyp, dárigerlik qyzmetimdi jalǵastyrmaqshymyn», - dedi U.Sabırova.

Eske sala keteıik, budan buryn bortta jas jigittiń júregi ustap, Oralǵa bet alǵan ushaqtyń Almatyǵa keri qonǵanyn jazǵan edik.