Oraldyqtar Jeńis alańynda Máńgilik alaýǵa gúl shoqtaryn qoıdy

ORAL. QazAqparat - Búgin Batys Qazaqstan oblysynda Jeńis kúni keńinen atalyp ótti, dep habarlaıdy QazAqparat tilshisi.

Oraldyqtar meıramdy Ekinshi dúnıejúzilik soǵys kezinde Oraldaǵy gospıtaldarda qaza tapqan jaýyngerler jerlengen baýyrlastar zıratyna, Keńes Odaǵynyń Batyry Temir Masın, marshal Georgıı Jýkov, qazaqtyń úsh batyr qyzy Mánshúk, Álııa, Hıýaz eskertkishterine, «Ol kúnderdiń dańqy óshpeıdi» memorıalyna jáne Jeńis alańyndaǵy Máńgilik alaýǵa gúl shoqtaryn qoıdy.

Máńgilik alaý janynda Ekinshi dúnıejúzilik soǵystan oralmaǵan batysqazaqstandyq jaýyngerlerdiń aty-jónderi qashalyp jazylǵan. Sondyqtan bul kúni árkim sol surapyl maıdanda qaza tapqan týysqandaryn eske alyp, taǵzym etedi.

Jeńis alańyna jınalǵan jurtshylyqty oblys ákimi Altaı Kólginov quttyqtap, bul merekeniń árbir qazaqstandyq úshin qasterli de qasıetti ekendigin jetkizdi.

«Elbasymyz aǵa býynnyń beıbit ómirdi saqtaý jolynda kórsetken kózsiz batyrlyǵyn árdaıym jadymyzdan óshirmeı, úlgi ete beretinimizdi atap ótken bolatyn. Jeńistiń qadir-qasıetin este saqtap, bolashaqqa amanat etý - barlyǵymyzdyń perzenttik paryzymyz. Jyl saıyn biz osy Jeńis alańyna jınalyp, ata-babalarymyzdyń rýhyna taǵzym etemiz», dedi oblys basshysy.

Ekinshi dúnıejúzilik soǵysqa 1 mln 800 myńnan astam qazaqstandyq qatyssa, sonyń ishinde 76 myńnan astam adam Batys Qazaqstan oblysynan maıdanǵa attandy. Solardyń tek teń jartysy elge oraldy. 528 adam qazaqstandyq Keńes Odaǵynyń Batyry atansa, sonyń ishinde 40-y - batysqazaqstandyqtar.

Maıdangerler qatary jyl saıyn sırep keledi. Uly Jeńistiń 73 jyldyǵyn bıyl Qazaqstan boıynsha 2067 maıdanger qarsy alsa, Batys Qazaqstan oblysynda 108-i ǵana qaldy.

Óńir basshysy atap ótkenindeı, batyrlarǵa degen qurmet báseńdemek emes. Budan buryn Oralda Mánshúk, Álııa jáne Hıýazǵa eskertkish ornatylǵany belgili. Endi batysqazaqstandyqtar Astananyń 20 jyldyǵyna oraı elordaǵa Mánshúk Mámetovanyń eskertkishin tartý etpekshi.
Jeńis kúnimen sondaı-aq soǵys jáne eńbek ardageri Hamza Safın quttyqtap, el basyna túsken osynaý náýbettiń endi eshqashan qaıtalanbaı, Qazaqstanda beıbitshilik saltanat qura berýine tilektestigin bildirdi.

Bul kúni qalalyq mádenıet jáne demalys saıabaǵynda maıdangerler men tyl eńbekkerleri «Sarbaz botqasynan» dám tatty.

Jeńis kúni oblys aýdandarynda da keńinen toılanyp ótti.