Oraldyq turǵyn arzan úı alamyn dep, alaıaqtarǵa aldanyp qaldy
Batys Qazaqstan oblystyq Polıtsııa departamenti krımınaldyq polıtsııa basqarmasynyń bólim bastyǵy Marat Súgirovtiń aıtýynsha, adamdar ınternet alaıaqtarǵa senip qalyp, jıi opyq jeıdi.
Oral qalasynyń turǵyny «OLX» saıtynda ornalastyrylǵan turǵyn úıdiń baǵasy tómen bolǵandyqtan, alaıaqqa habarlasyp, onyń qurǵan tuzaǵyna túsedi. Alaıaq ózin basqa qaladamyn dep sendirip, turǵynnyń aqshasy saqtalǵan esepshotyn kórsetýdi ótinedi. Ańǵal satyp alýshy rekvızıtterimen esepshottyń kóshirmesin jiberedi. Alaıaq sony paıdalanyp, aqshany basqa esepshotqa aýdaryp úlgeredi.
M.Súgirovtiń sózine qaraǵanda, mundaı alaıaqtar negizinen basqa óńirlerde turatyndyqtan, olardy ustaý ońaı emes.
«Jyl basynan beri polıtsııa qyzmetkerleri Astana, Pavlodar, Qaraǵandy, Balqash, Almaty, Taraz jáne Aqtóbe qalalaryna baryp, 12 qylmys jasaǵan ınternet alaıaqtardy qolǵa túsirdi. Olar saıttarda úı, kıim, altyn buıymdar satamyz, jumysqa ornalasýǵa kómektesemiz dep, habarlandyrý uıymdastyryp, aldyn ala aqsha surap, alyp otyrǵan. «Іs bitip, qý ketkennen» keıin telefondaryn aıyryp tastaıdy. Qazirgi kezde atalǵan derekter boıynsha tergeý júrgizilýde», dedi M.Súgirov.