Oraldyq ozat túlek Nazarbaev Ýnıversıtetiniń grantyn utyp aldy

ORAL. QazAqparat – Oral qalasyndaǵy №41 mektep-lıtseıiniń bıylǵy túlegi, «Altyn belgige» úmitker Mereı Qonaqbaeva Nazarbaev Ýnıversıtetiniń grantyn utyp aldy, dep habarlaıdy QazAqparat tilshisi.

BQO bilim basqarmasynyń baspasóz qyzmeti málim etkendeı, taǵy bir túlek otandyq oqý ornyn tańdap, maqsatyna qol jetkizip otyr.

Mereıdiń sózine qaraǵanda, Nazarbaev Ýnıversıtetine túsýdi 11-synyptyń basynda-aq maqsat etken.

Sodan keıin ýnıversıtet týraly tolyq aqparat jınaqtap, emtıhandaryna daıyndala bastaǵan.

«Nazarbaev ýnıversıtetine oqýǵa túsý úshin eki emtıhannan ótý kerek, birinshisi aǵylshynnan bilimińdi tekserý maqsatynda IELTS nemese Duolingo English Test tapsyrý qajet. Men Duolingo English Test synaǵyn ótken jyldyń jeltoqsan aıynda tapsyryp, joǵary ball jınap, ekinshi týr NUFYPET-ke óttim. NUFYPET – bul mańyzdy, sheshýshi emtıhan, munda matematıka jáne synı turǵydan test tapsyrý qajet. Bul testke eki aı shamasynda daıyndalyp, qalaǵan deńgeıdegi ball jınadym. Atalǵan test UBT-dan ózgeshe bolǵanymen, oǵan daıyndalý ózim úshin qyzyqty boldy. Eń bastysy, aldyna maqsat qoıa bilse, kim-kim úshin de alynbaıtyn asý joq dep oılaımyn», dedi Mereı Qonaqbaeva.

Eske sala keteıik, budan buryn 140 baldyq sertıfıkatqa ıe bolǵan eki túlektiń otandyq JOO-ny tańdaǵanyn jazǵan bolatynbyz.