Oraldyq oqýshylar Tuńǵysh Prezıdenttiń ómir jolymen tanysty
«Zamanaýı Qazaqstan. Elbasynyń kóshbasshylyǵy sabaqtary» taqyrybynda ótken ashyq sabaqta Elbasynyń táýelsiz memleket qurýdaǵy róli, Qazaqstannyń Táýelsizdik jyldarynda qol jetkizgen tabystary aıtyldy.
Óńirge tanymal tarıhshy, ólketanýshy, «KazIITÝ» ǵylymı-bilim kesheni rýhanı jańǵyrý kafedrasynyń meńgerýshisi Saılaý Súleımenov Oral qalasyndaǵy M.Mámetova atyndaǵy №27 fızıka-matematıka baǵytyndaǵy mektep-lıtseıiniń joǵary synyp oqýshylarymen, ustazdarymen kezdesti.
«Ashyq sabaq barysynda Elbasymyzdyń ómirbaıanyna qysqasha toqtalyp, onyń qaıratkerlik, tulǵalyq, adamı qasıetterin barynsha ashyp kórsetýge tyrystym. Aldymen oqýshylyq kezinen syr sherttim. Qaskeleńdegi mýzeıinde bolǵanmyn, sondyqtan Tuńǵysh Prezıdenttiń qarapaıym otbasynan shyqqanyn, jastaıynan sportpen aınalysyp, dombyra shertip, án salǵanyn aıttym. Onyń ósý joldary óz aldyna, halqymyz úshin Semeı ıadrolyq polıgonyn jabýdaǵy eńbegi erekshe edi. Búkil álem moıyndaǵan tulǵa týraly oqýshylar da salıqaly, salmaqty suraqtar qoıyp, qyzyǵýshylyq tanytty», dedi QazAqparat tilshisine Saılaý Hamıtuly.
Ashyq sabaqqa qatysqan 11-synyp oqýshysy Armat Orazov Elbasy jónindegi tanym-túsinikteriniń molaıa túskenin jetkizdi.
Mektep dırektorynyń tárbıe isi jónindegi orynbasary Aınur Balǵazıevanyń aıtýynsha, bilim ordasynda ashyq sabaq Tuńǵysh Prezıdent kúnine oraı on kúndik sharalar aıasynda ótti. Budan basqa dóńgelek ústelder, sýretter baıqaýy, shyǵarmalar saıysy, bı marafony, synyp saǵattary, shahmat jarysy jalǵasyn tabýda.