Oraldyq kásiporynda teri óńdeý tsehyn ashý josparlanýda
-Talǵat Málikuly, koronavırýs indetine baılanysty elimizde karantındik shekteý sharalary engizilgeni belgili. Bul jaǵdaı sizdiń kásiporynǵa qalaı áser etti?
-Kompanııa eki zaýyttan turady, olarda 500-den astam qyzmetker eńbek etedi. 1992 jyly qalbyr zaýyty iske qosylǵan bolatyn, qazirgi kezde 100-den astam ónim túrleri shyǵarylady. Al 2015 jyly tońazytylǵan, muzdatylǵan et pen jartylaı fabrıkattar óndirý úshin et óńdeý kesheni (qýaty 400 bas iri qara jáne 700-deı ýaq jandyq) iske qosyldy. Eki zaýyt ta avtomattandyrylǵan jumys protsesin qamtamasyz etetin qazirgi zamanǵy eýropalyq qural-jabdyqpen jaraqtandyrylǵan. Bul «Kýbleı» JShS-na joǵary sapaly ónim óndirýge múmkindik beredi.
Tótenshe jaǵdaı kezinde azyq-túlik kásiporyndarynyń qyzmeti toqtatylmaǵandyqtan, elimizdi azyq-túlik ónimderimen qamtýdy jalǵastyrdy. Qyzmet barysynda logıstıka men jınaqtaýshy taýarlarǵa qatysty keıbir qıyndyqtar týyndaǵanymen, ýákiletti memlekettik organdar men «Atameken» UKP-nyń yqpal etýimen sheshilip otyrdy.
-Kásiporynda ozyq tehnologııalar negizinde qandaı jumystar atqarylýda?
-Halyqaralyq naryqta básekege qabiletti jáne rentabeldi bolyp qalý úshin biz qaldyqsyz óndiriske den qoıyp kelemiz. Mysaly, 2018 jyly mal qaldyqtaryn (azyq-túliktik emes) qaıta óńdeý jáne etsúıek unyn óndirý tsehy paıdalanýǵa berildi. Bul ónim qus fabrıkalarynda broılerdiń tirek-qımyl apparaty men súıegin nyǵaıtý úshin úlken suranyspen paıdalanylady. Jumyrtqa sapasyn arttyrý úshin mekıenderge de paıdaly. Sondaı-aq sabyn óndirýde qoldanylatyn mal maıyn alý da jolǵa qoıyldy.
-«Kýbleıdiń» ónimderi qaı elderge eksporttalýda?
-Kásiporyn ónimderi Qazaqstan ǵana emes, sonymen qatar Iran, Qytaı, Qyrǵyzstan, Túrkimenstan, Reseı sııaqty elderge de jóneltilip keledi. Kompanııa tabystarynyń biri retinde Oral, Atyraý jáne Aqtaý qalalarynyń sýpermarketterinde germetıkalyq vakýýmdyq oramaǵa salynǵan sıyr eti, qazy jáne ishek-qaryn ónimderiniń satylyp jatqanyn aıtýǵa bolady.
-Sońǵy saýal, aldaǵy josparlaryńyz jóninde de aıta ketseńiz?
-Bıyl hromdalǵan WET-BLUE jartylaı fabrıkatyn óndirý úshin teri óńdeý tsehyn iske qosýdy kózdep otyrmyz. Qazirgi kezde iske qosý-retteý jumystaryn júrgizetin ıtalıandyq mamandardyń kelý máselesi ýákiletti memlekettik organdarmen pysyqtalýda. Tseh iske qosylǵan kezde jańa jumys oryndaryn asha alamyz, bul qazirgideı kúrdeli kezeńde asa mańyzdy. Jergilikti turǵyndardan teri alýdy da josparlap otyrmyz. Italıandyq jabdyqtyń qýaty aýysymyna 600 terini óńdeýge jetedi. Al jartylaı fabrıkatty jergilikti naryq qana emes, Eýropa elderine, Reseı men Qytaıǵa ótkizetin bolamyz.