Oraldyq eriktiler Sırııaǵa gýmanıtarlyq kómek jóneltti
Batys Qazaqstan oblysy Qazaqstan halqy Assambleıasy janyndaǵy «Dostyq» qazaq-vaınah klýby jeti jyldan beri volonterlik qyzmetpen aınalysyp keledi. Jastar kóktemde sý tasqyny kezinde qınalǵandarǵa kómek kórsetse, búginde az qamtylǵan otbasylar men muqtaj jandarǵa qol ushyn sozýda. Túrkııa men Sırııadaǵy sońǵy oqıǵalar da olardyń nazarynan tys qalmady.
«Túrkııa men Sırııada jer silkinisi bolǵan kezde biz birden Qazaqstannyń basqa qalalarynan kelgen eriktiler men qoǵam qaıratkerlerimen, sondaı-aq Astanadaǵy front-ofıspen baılanysqa shyqtyq. Úkimetimiz qarajatpen birge azyq-túlik, zattar men qurylys materıaldaryn jınaýǵa kiristi. Oralda bul qozǵalysty men basqardym», – deıdi «Dostyq» klýbynyń tóraǵasy Talǵat Chýdobaev.
Zattar men buıymdardy jınaý úshin bólme qajet bolǵan, ony «ıÝnost» stadıonynyń basshylyǵy qamtamasyz etken. Oraldyqtar úsh apta boıy qoldarynda baryn usyndy. Osy ýaqyt ishinde bes tonna júk jınaldy, onyń ishinde balalarǵa arnalǵan qysqy aıaq kıimder men syrt kıimder, áıelder, erler kıimderi, tósek-oryn, azyq-túlik, qurylys materıaldary, ózge de kerek-jaraqtar bar.
«Bizdiń turǵyndar sondaı janashyrlyq tanytýda. Osyndaı sumdyq jaǵdaıǵa tap bolǵan adamdardy tanymaıtyndyǵymyzǵa, Túrkııa men Sırııanyń bizden alystyǵyna qaramastan, batysqazaqstandyqtar ıgi isten shet qalmady. Oǵan qosa, bir mıllıon teńge jınadyq, ony arnaıy esepshotqa aýdaramyz», - dedi Talǵat Chýdobaev.
Úsh apta boıy «Oral jastary», «Aqjaıyq jastary», «Assambleıa jastary» uıymdarynyń eriktileri tańǵy 9.00-den, keshki 21.00-ge deıin eki aýysymmen jumys istedi. Olardy oblys ortalyǵyndaǵy kásipkerler men qarapaıym turǵyndar ystyq tamaqpen qamtydy.