Oraldyq eriktiler ardagerlerdi Elorda kúnimen quttyqtady
BQO jastar saıasaty máseleleri basqarmasynyń qoldaýymen «Oral jastary», «Jas Otan» JQ, «Aqjaıyq jastary», «Jasyl el» men «Stýdenttik qurylys jasaǵynyń» volonterleri Ekinshi dúnıejúzilik soǵys jáne tyl ardagerleriniń úıine arnaıy bardy.
Eriktiler karantın talaptaryn saqtaı otyryp, ardagerlerge quttyqtaý ashyq haty men estelik syılyqtaryn tabys etip, merekege arnalǵan shaǵyn kontserttik baǵdarlama usyndy.
Ardagerler volonterlerge osy yqylas-nıeti úshin alǵystaryn bildirip, batasyn berdi. Solardyń biri, soǵys ardageri Madrasul Ǵaıfýllın bıyl 95 jasqa tolsa da, áli tyń. Este saqtaý qabileti myqty. Elorda kúnin maıdanger Qazaqstannyń bas qalasyna degen qurmet, tatýlyq pen kelisim merekesi dep biledi.
«Elimizdiń bolashaǵy – jastar. Olardyń osylaısha úlkenderge izet bildirip, aldymyzǵa kelýi bir serpiltip tastady. Jastarǵa tek dańǵyl jol, jarqyn keleshek tileımin», dedi M.Ǵaıfýllın aqsaqal.
«Oral jastary» volonterlik qozǵalysynyń jetekshisi Dýlat Júsipqalıev aǵa býynnyń erligi men eńbegi eshqashan umytylmaıtynyn, óskeleń urpaq úshin eskirmeıtin úlgi ekendigin jetkizdi.
«Biz ardagerlerimizdi árqashan qadir tutamyz. Erikti jastardyń osy baǵyttaǵy jumystary aldaǵy ýaqytta da jalǵasatyn bolady», dedi D.Júsipqalıev.
Eske sala keteıik, budan buryn Oralda «Bes urpaq» saýyqtyrý saıabaǵy ashylǵanyn jazǵan bolatynbyz.