Oraldyq dárigerlerge memlekettik nagradalar tabys etildi

ORAL. QazAqparat – Oralda indetpen kúreste aldyńǵy shepte júrgen dárigerlerge memlekettik nagradalar tabys etildi, dep habarlaıdy QazAqparat tilshisi.

Saltanat saraıynda ótken sharada oblys ákimi Ǵalı Esqalıev adamdar ómirin qutqarýdaǵy aq jeleńdi abzal jandardyń jankeshti eńbegin atap ótti.

Onyń aıtýynsha, búgingi sharaǵa 15 dáriger shaqyrylsa, birqatary ózderi dertke shaldyǵyp qaldy. Keıbireýi jumysta bolyp, kele almady.

«Búgingi marapat – birneshe aı boıy koronavırýs ınfektsııasymen kúresip jatqan barlyq medıtsına qyzmetkerlerine kórsetilgen shynaıy qurmet. Ózgelerdiń densaýlyǵyn saqtaý úshin úı kórmeı, ýaqytpen sanaspastan, Gıppokrat antyna adal bolyp, eńbek etip kelesizder. Aýyryp qalǵan áriptesterińiz tezirek jazylyp, qatarǵa qosylsyn. Oblysta dáriger jetispeýshiligi sezilýde. Jýyrda arnaıy oqý ornyn bitirgen mamandar keledi. Medıtsınalyq qural-jabdyqpen, dári-dármekpen qamtý máselesi de sheshiledi. Bárińizge amandyq-saýlyq tileımin», - dedi óńir basshysy.

Marapattalǵandar arasynda oblystyq juqpaly aýrýlar aýrýhanasynyń bólimshe meńgerýshisi Bıbigúl Aıtbaeva «Parasat», oblystyq kópbeıindi aýrýhanasynyń dárigeri Marat Balshambaev «Qurmet» ordenine ıe boldy. Sondaı-aq oblystyq juqpaly aýrýlar aýrýhanasyynń reanımatology Salaýat Aqdaýov, oblystyq kardıologııalyq ortalyǵynyń dárigeri Danııar Arenov, oblystyq juqpaly aýrýlar aýrýhanasynyń aǵa medbıkesi Álııa Maýjanova «Eren eńbegi úshin», oblystyq kópbeıindi aýrýhanasynyń medbıkesi Ásıma Ǵaısına «Shapaǵat» medalimen, oblystyq kardıologııalyq ortalyqtyń medbıkesi Venera Myrzaǵalıeva QR Qurmet gramotasymen marapattaldy.

Eske sala keteıik, budan buryn Batys Qazaqstanda 5 shildeden bastap qandaı shekteý sharalary engiziletinin jazǵan bolatynbyz.