Oraldaǵy kóshi-qon polıtsııasynyń bastyǵy para aldy degen kúdikke ilindi

ORAL. QazAqparat – Oral qalasy kóshi-qon polıtsııasy qyzmetiniń bastyǵy Qanat Muqanov para aldy degen kúdikpen qamaýǵa alyndy, dep habarlaıdy QazAqparat tilshisi.

BQO sotynyń baspasóz qyzmeti málim etkenindeı, Oral qalasy mamandandyrylǵan tergeý soty BQO boıynsha sybaılas jemqorlyqqa qarsy qyzmet departamenti tergeý basqarmasynyń asa mańyzdy ister jónindegi tergeýshisi Erlan Quljanovtyń Q.Muqanovqa qatysty kúzetpen ustaý túrindegi bultartpaý sharasyn eki aıǵa sanktsııalaý týraly ótinishhatyn qarap, qanaǵattandyrdy.

Sottan túsken málimetke qaraǵanda, 43 jastaǵy Q.Muqanov QR QK 366-baby 1-1-bóligine (para alý) sáıkes kúdikke ilinip otyr.

BQO prokýratýrasynyń baspasóz qyzmeti atalǵan qylmystyq istiń BQO boıynsha sybaılas jemqorlyqqa qarsy qyzmetpen tergelip jatqanyn jetkizdi. QR Qylmystyq is júrgizý kodeksi 201-babyna sáıkes ózge aqparat jarııalaýǵa jatpaıdy.