Oraldaǵy Dostyq-Drýjba dańǵyly Nursultan Nazarbaevtyń esimimen atalady

ORAL. QazAqparat - Oraldaǵy Dostyq-Drýjba dańǵyly Nursultan Nazarbaevtyń esimimen atalatyn boldy. Bul týraly sheshim Oral qalalyq máslıhatynyń kezekten tys HHH sessııasynda qabyldandy, dep habarlaıdy QazAqparat tilshisi.

Sessııany ashqan Oral qalalyq máslıhatynyń hatshysy Aqqalı Áýbekerov kún tártibine qaladaǵy Dostyq-Drýjba dańǵylyn Nursultan Nazarbaevtyń esimimen qaıta ataý týraly bir máseleniń engizilgenin jetkizdi.

Sessııada Oral qalalyq máslıhaty normatıvtik-quqyqtyq máseleler jónindegi turaqty komıssııasynyń tóraǵasy Amangeldi Ermekqalıev, Oral qalalyq qoǵamdyq keńesiniń tóraǵasy Baqytjan Nurbaev, qalalyq máslıhat depýtattary Valentına Mıhno, Ánýar Muqataev Tuńǵysh Prezıdent Nursultan Nazarbaevtyń táýelsiz Qazaqstandy damytýdaǵy eńbegi orasan ekendigin, Dostyq dańǵylynyń endigi jerde ulttar dostyǵyn bekemdegen Elbasynyń esimimen atalýy jarasatyndyǵyn atap ótti.

Jıynǵa qatysqan Oral qalasynyń ákimi Murat Muqaev búgin Qazaqstan Prezıdenti Qasym-Jomart Toqaevtyń Parlament palatalarynyń birlesken otyrysynda Tuńǵysh Prezıdenttiń esimin máńgilikke qaldyrý úshin oblys ortalyqtaryndaǵy negizgi kóshelerdiń birine Nursultan Nazarbaevtyń esimin berý týraly usynys jasaǵandyǵyn aıtty. Osyǵan qaraı Oral qalasy ákimdigi, qalalyq qoǵamdyq keńes jáne turǵyndardyń birlesken jıyny ótip, Dostyq-Drýjba dańǵylyn Nursultan Nazarbaevtyń esimimen ataý jónindegi usynysty tolyq qoldady.

Depýtattar bul usynysty biraýyzdan qoldady.