Oralda zoobaqtaǵy janýarlar men qustar qaýipsiz jerge kóshirildi
Ortalyq dırektorynyń orynbasary Gúljaına Nuralıevanyń málim etkenindeı, Shaǵan ózeni jaǵasynda ornalasqan zoobaqta barlyǵy irili-usaqty 250 janýar, ań-qustar bar.
Onyń sózine qaraǵanda, eshkilerdi, taýyq, qustardy jeke aýlasy bar úılerde turatyn qyzmetkerler alyp ketken.
«Tyshqandar, dıkobraz, maımyldar, sondaı-aq jylqy, ponı, esekterimizdi oblystyq estý qabileti buzylǵan balalarǵa arnalǵan arnaıy mektep-ınternattyń garajy men qoımasyna ornalastyrdyq. Sonda baryp, qarap turamyz» dedi G.Nuralıeva.
Qazirgi kezde zoobaqta aıý, qasqyr, pýma sııaqty jyrtqysh ańdar ǵana qaldy.
«Bul rette biz mamandarmen keńesip, aqyldastyq. Jyrtqyshtardy uıqtatyp, kóshirsek, qaıta oıanbaı qalýy múmkin. Sondyqtan olardyń turǵan jerlerin úsh metrge kóterdik. Osynda kelip, tamaǵyn, sýyn berip turamyz. 2011 jyly sýǵa ketkende de sóıtkenbiz, qaıyǵymyz bar. Ortalyqta adamdar kóp emes, 13 pedagog, otyz shaqty qyzmetkerlerimiz jumys isteıdi. Qazirgi basty maqsatymyz — barlyq janýar, ań-qustarymyzdy sý tasqynynan aman alyp qalý» dedi Kazinform tilshisine G.Nuralıeva.
Eske sala keteıik, budan buryn Oralda evakýatsııalyq pýnktte turyp jatqan kelinshektiń tórtinshi balanyń anasy atanǵanyn jazǵan bolatynbyz.
Sondaı-aq Oralda sý tasqynynan zardap shekken turǵyndardan 640-tan astam ótinish qabyldandy.
Batys Qazaqstanǵa ózge óńirlerden myńǵa jýyq adam kómekke tartyldy.