Oralda júk kóligi mektep qorshaýyn buzyp ótti

<p>ORAL. KAZINFORM &ndash; Oral qalasynda jol-kólik oqıǵasy bolyp, saldarynan júk kóligi mektep aýlasyna kirip ketken.</p>

Qaladaǵy №36 orta mektep dırektory Erik Temirǵalıevtiń málim etkenindeı, oqıǵa 14 qarasha kúni shamamen saǵat 21.00-den kete boldy.

K.Meńdálıev kóshesimen kele jatqan júk kóligi áýeli Hyundai jeńil kóligimen túıisip, sodan keıin mektep qorshaýyn buzyp ótken. 

«Jol apaty saldarynan syrtqy qorshaý syndy. Ony júrgizýshi qalpyna keltiredi. Avtoólikterdi aıyp turaǵyna alyp ketti. Aldyn ala málimetke qaraǵanda, júk kóligi júrgizýshisiniń júregi ustap qalǵan», - dedi Kazinform tilshisine № 36 mektep dırektory Erik Temirǵalıev.

Oral qalasy bilim berý bólimi baspasóz qyzmetiniń naqtylaýynsha, qorshaý qulaǵan, mektep qabyrǵasynyń syrtqy sylaǵy túsip qalǵan. Asa úlken zaqym kelmegen.

BQO polıtsııa departamentiniń baspasóz qyzmetinen túsken málimetke qaraǵanda, jartylaı tirkemesi bar «Scania» júk kóliginiń júrgizýshisi K.Meńdálıev kóshesimen kele jatyp, №36 mektep mańynda jol qozǵalysy qaýipsizdigin qamtamasyz etpeı, rýlge ıe bola almaı, toqtap turǵan «Nýundai 130» kóligimen túıisýge jol bergen. Sodan keıin temir qorshaýdy buzyp ótip, mektep aýlasyna kirip, qabyrǵaǵa tirelip toqtaǵan. Mektep ǵımaratyna zaqym kelmegen. 

«Jol apaty saldarynan «Scania» júk kóliginiń júrgizýshisi es-tússiz kúıinde aýrýhanaǵa jetkizilip, neıroınsýlt bólimine jatqyzyldy. Zardap shekkender joq, kólik ıelerine materıaldyq shyǵyn keltirilgen», dep habarlady vedomstvodan.

Eske sala keteıik, budan buryn BQO-da reseılik áskerı tehnıkanyń aýyl ishimen júrýine baılanysty júrgizýshige eskertý jasalǵanyn jazǵan edik.