Oralda Juban aqynǵa eskertkish ornatylady

ORAL. QazAqparat – Aqyn, Qazaqstannyń halyq jazýshysy, Memlekettik syılyqtyń ıegeri Juban Moldaǵalıevke Oral qalasynda eskertkish ornatylady, dep habarlaıdy QazAqparat tilshisi.

Oblystyq mádenıet basqarmasy basshysynyń mindetin atqarýshy Saıran Dúısenteginiń aıtýynsha, bul shara aqynnyń 100 jyldyǵy aıasynda júzege aspaqshy.

«Qazirgi kezde eskızdik jobalar QR Mádenıet jáne sport mınıstrligine joldandy. Respýblıkalyq komıssııa bekitkennen keıin eskertkish ornatý jumystary bastalady. Ony Oraldaǵy Juban baǵynda ornatý kózdelýde. Onda turǵan aqyn músini basqa jerge kóshiriledi», dedi QazAqparat tilshisine Saıran Dúısentegi.

Juban Moldaǵalıevtiń 100 jyldyǵyna arnalǵan negizgi sharalardy qyrkúıek aıynyń aıaǵynda ótkizý josparlanýda.

Halyqaralyq Juban oqýlary, respýblıkalyq ǵylymı-tájirıbelik konferentsııa, úsh tilde entsıklopedııa shyǵarý syndy sharalar júzege asyrylady. Týǵan jeri Aqjaıyq aýdanynda demeýshilerdiń kúshimen Juban ortalyǵyn salý oılastyrylýda.

Juban Moldaǵalıev – Qazaqstan ǵana emes, 1978 jyly KSRO Memlekettik syılyǵyn ıelenip, odaqtyq deńgeıde de moıyndalǵan aqyn. KSRO jáne Qazaqstannyń Joǵary keńesiniń depýtaty bolǵan ol elimizdiń Jazýshylar odaǵyn da basqardy.

Qylyshynan qan tamǵan keńestik dáýirdiń ózinde «Men – qazaqpyn» dep jar salyp, ataqty poemasyn jazǵan qaıratker aqyn 1986 jylǵy Jeltoqsan kóterilisi kezinde buǵyp qalmaı, Kolbınge aşy shyndyqty jaıyp salyp, jastarǵa arasha tústi. Juban Moldaǵalıev osy biregeı erligimen de el esinde qalatyn bolady.

Qazirgi ýaqytta oblysta J.Moldaǵalıevtiń 100 jyldyǵyna oraı arnaıy jumys toby jumys jasap jatyr.

Aıbarly aqynǵa Oralda ǵana emes, elorda men Almatyda eskertkish ornatý, Halyq qaharmany ataǵyn berý týraly usynystar aıtylýda.

Eske sala keteıik, budan buryn Aqsaı qalasynda Abaıdyń eskertkishi ornatylatynyn jazǵan bolatynbyz.