Oralda jol apatynan júrgizýshi mert bolyp, alty adam aýrýhanaǵa tústi
BQO polıtsııa departamentiniń baspasóz qyzmetinen málim etkenindeı, oqıǵa 6 shilde kúni saǵat 19:00-de Samara-Shymkent jolyndaǵy 3-saıajaı qoǵamy aıaldamasy tusynda boldy.
«50 jastaǵy júrgizýshi «Folksvagen Passat» avtokóliginiń rýline ıe bola almaı, qarsy betke shyǵyp ketken. Sonyń saldarynan 53 jastaǵy júrgizýshi aıdap kele jatqan «Toıota Avensıs» avtokóligimen soqtyǵysady. Jol apaty saldarynan 50 jastaǵy júrgizýshi oqıǵa ornynda kóz jumdy. «Toıota Avensıs» avtokóliginde otyrǵan 1988 jylǵy jolaýshy áıel aýrýhanaǵa jetkizildi. Qazirgi kezde QR QK 345-baby 3-bóligine sáıkes sotqa deıingi tergeý amaldary júrgizilip jatyr», - dep habarlady departamentten.
Oblystyq densaýlyq saqtaý basqarmasy baspasóz qyzmetiniń naqtylaýynsha, jedel járdem saǵat 19:27-de shaqyrtylǵan. Júrgizýshi jedel járdem jetkenge deıin qaıtys boldy.
Aýrýhanaǵa jetkizilgen alty adamǵa bastapqyda qoıylǵan dıagnozdar rastalmady. Olardyń bári de ambýlatorlyq em alýǵa jiberildi.
Eske sala keteıik, budan buryn Oral qalasynda tok soqqan eki er adamnyń jansaqtaý bóliminde jatqanyn jazǵan bolatynbyz. Ekeýi áli de aýrýhanada. Bireýi jansaqtaý bóliminde, jaǵdaıy turaqty aýyr.