Oralda jazýshy Mıra Shúıinshálıevanyń shyǵarmashylyq keshi ótti
Aldymen M.Shúıinshálıeva men kesh qonaqtaryn oblys ákimi Altaı Kólginov qabyldap, qurmet kórsetti.
H.Bókeeva atyndaǵy Batys Qazaqstan oblystyq qazaq drama teatrynyń foıesinde qalamgerdiń besinshi kitaby - «Ar azaby» jınaǵy kópshilikke tanystyrylyp, oqyrman qaýymǵa jol tartty.
Sahnadan Mıra Hamzaqyzynyń «Shúberek qýyrshaq», «Úsh tómpeshik», «Qaýyrsyn gúl», «Ókinish», «Tuıaq», «Taqsyret» jáne «Ar azaby» atty týyndylarynan úzindiler oqylyp, teatrlandyrylǵan kórinister qoıyldy.
BQO ákiminiń orynbasary Ǵabıdolla Ospanqulov óńir basshysynyń atynan Mıra Shúıinshálıevaǵa shyǵarmashylyq tabystarǵa jete berýine tilektestigin bildirdi.
«Mıranyń alǵashqy áńgimelerine aq jol tilep, ásirese, «Ar azaby» kitabyn tolyq oqyp shyqqannan keıin onyń ósý ústinde ekenine kózim jetti. Sodan beri bes kitap jazyp tastapty. Bul az eńbek emes. Endi sol bıikten tómendemeý - mindet. Proza jazý ońaı emes, dramatýrgııa odan da qıyn. Mysaly, Máskeýde on myń jazýshy bolsa, sonyń ony ǵana dramatýrg. Bir qaraǵanda, pesa jazý ońaı kóringenimen, múlde olaı emes. Qazaqta dramatýrgııa az. Osy oraıda Mıranyń eki pesasy spektakl qoıýǵa suranyp-aq tur. Al «Sińlimniń súıgeni» povesinde áıelderdiń obrazy sheber beınelengen. Jalpy, jazýshy qazirgi zaman keıipkerleriniń jan dúnıesine úńilip, qaınap turǵan ómir qaltarystaryn sýretteı biledi», dedi keshke arnaıy kelgen belgili jazýshy-dramatýrg, Memlekettik syılyqtyń ıegeri Dýlat Isabekov.
«Orys jazýshysy ıÝrıı Trıfonovtyń «Jas jazýshyǵa aqyl aıtpa, onyń shyǵarmalarynyń shyǵyp ketýine kómektes» degen sózi bar. Sol sózdi úlgi ete otyryp, kezinde ádebıetimizdiń aqsaqaly Ábdijámil Nurpeıisov, klassık jazýshymyz Dýlat Isabekov úsheýmiz Mıranyń tyrnaqaldy týyndysyn respýblıkalyq jýrnalǵa jarııalaǵanbyz. Sol kezde qatelespegen ekenbiz. Mıra qazir qabyrǵaly qalamgerge aınaldy. Tipti ony Qazaqstannyń batys aımaǵyndaǵy qyzdar arasynan shyǵyp otyrǵan jalǵyz jazýshymyz deýge bolady», dedi jazýshy-baspager, Qazaqstan Jazýshylar odaǵy basqarmasy tóraǵasynyń orynbasary, Qazaqstannyń eńbek sińirgen qaıratkeri Mereke Qulkenov. M.Qulkenov Mıra Shúıinshálıevaǵa Qazaqstan Jazýshylar odaǵy basqarmasynyń tóraǵasy Ulyqbek Esdáýletovtiń atynan quttyqtaý hatty tabys etti.
Keshte sondaı-aq Qazaqstan Jazýshylar odaǵy Batys Qazaqstan jáne Atyraý oblystyq bólimsheleriniń basshylary, aqyndar Aqushtap Baqtygereeva men Qoıshyǵul Jylqyshıev, M.Shúıinshálıevanyń shyǵarmalaryn zerttep júrgen M.Áýezov atyndaǵy ádebıet jáne óner ınstıtýtynyń bas ǵylymı qyzmetkeri, fılologııa ǵylymdarynyń doktory, professor Gúljıhan Orda izgi tilek-nıetterin bildirdi.
Shyǵarmashylyq kesh barysynda M.Shúıinshálıevanyń sózderine jazylǵan ánder oryndaldy. Kesh ıesi de óz óleńderin oqyp berdi.