Oralda jazýshy Qajyǵalı Muhambetqalıulymen kezdesý keshi ótti
«Rýhanı jańǵyrý» baǵdarlamasy aıasynda ataqty sheshen, bı, batyr Syrym Datulynyń 275 jyldyǵyna arnalǵan sharaǵa qatysqan oblys ákimi Altaı Kólginov Qajyǵalı Muhambetqalıulynyń jazýshylyq eńbegin atap ótti. Basqa shyǵarmalaryn bylaı qoıǵanda, ol Syrym batyr týraly «Tar kezeń» romanyn jıyrma jyldaı ýaqyt boıy izdenip, 2012 jyly jaryqqa shyǵarǵan bolatyn. Keıin osy kesek týyndysy úshin Memlekettik syılyqtyń ıegeri atandy. Oblys basshysy bıyl 75 jastyń bıigine shyǵyp otyrǵan qalamgerge óńir jurtshylyǵy atynan alǵysyn aıtyp, ıyǵyna shapan japty.
Kesh barysynda tarıhı taqyryptarǵa qalam tartyp júrgen taǵy bir jazýshy, Memlekettik syılyqtyń ıegeri, Qazaqstannyń eńbek sińirgen qaıratkeri Ánes Saraı jasy kishi bolsa da, ózi dos tutqan Qajyǵalı Muhambetqalıuly týraly jyly lebizin bildirdi.
Qajyǵalı Muhambetqalıuly Syrym Datulyndaı tarıhı tulǵany jazý arqyly sol tar kezeńdi, qazaq halqynyń ómirin, onyń azattyq úshin kúresin beıneleýdi maqsat tutqanyn aıtyp, oqyrmandar saýaldaryna ornyqty jaýap berdi. «Syrym Datuly - bostandyq jolyndaǵy uly kúrestiń bastaýynda turǵan aıtýly tulǵalardyń biri. Eger onyń halqy úshin jasaǵan eńbegi men erligin, kósemdigi men sheshendigin elge tanyta bilsek, sonyń ózi - úlken baqyt», dedi qalamger.