Oralda jazasyn óteýshi men onyń anasynyń shaǵymyndaǵy dáıekter rastalmady

ORAL. QazAqparat - Oral qalasyndaǵy RÝ-170/2 mekemesinde jazasyn ótep jatqan Jeńis Kóshekbaev pen onyń anasy Álıma Kóshekbaevanyń shaǵymynda kórsetilgen dáıekter rastalmady, dep habarlaıdy «QazAqparat» HAA tilshisi.

«QazAqparat» budan buryn habarlaǵanyndaı , 12 qańtar kúni buqaralyq aqparat quraldarynda Á.Kóshekbaevanyń QR Prezıdenti atyna joldaǵan beıneshaǵymy jarııalanǵan bolatyn.

BQO prokýratýrasynyń baspasóz qyzmetinen túsken málimetke qaraǵanda, aryzda kórsetilgen ýájderdi tekserý úshin top qurylyp, J.Kóshekbaevtyń qaýipsizdigin qamtamasyz etý maqsatynda ol arnaıy prokýrordyń qaýlysymen Oral qalasynyń tergeý ızolıatoryna aýystyryldy.

Oblys prokýratýrasynyń arnaıy prokýrorlar basqarmasy J.Kóshekbaevqa qatysty azaptaý áreketteri jáne jazasyn óteýshilerdiń ózine-ózi qol jumsaýyna jetkizý derekteri boıynsha QR QK 146-baby 2-bóligi 1-tarmaǵy boıynsha sotqa deıingi tergep-tekserýdi júrgizdi.

Jaýap alynǵan J.Kóshekbaev ózine jáne ózgelerge qatysty azaptaý áreketteri bolmaǵandyǵyn jáne kórmegendigin aıtty. Alaıda jazasyn óteýshiler J.Úsenov pen A.Bogomazdan taǵy bir jazasyn óteýshi N.Bekbergenovti mekeme qyzmetkerleri M.Esengeldın men A. Myrzashevtiń únemi azaptaýyn kórgendigin, sonyń saldarynan atalǵan sottalýshynyń ótken jyldyń tamyz aıynda asylyp qalǵandyǵyn estigenin jetkizdi.  

Shaǵym jazýǵa anasy men atalǵan mekeme qyzmetkerleriniń kelispeýshiligi sebep bolǵan. Bıylǵy 16 qańtardaǵy sot-medıtsınalyq saraptama qorytyndysyna sáıkes J.Kóshekbaevtyń denesinen eshqandaı jaraqat anyqtalmaǵan.

Sondaı-aq J.Úsenov te mekeme ákimshiligi tarapynan qınaý áreketteriniń bolmaǵandyǵyn, al N.Bekbergenovti azaptaý týraly jazasyn óteýshiler A.Erǵalıev pen E.Aqbatyrovtan estigendigin kórsetti. Onyń denesinde de jaraqattar bolmaǵan. A.Erǵalıev pen E.Aqbatyrovqa qosa basqa jazasyn óteýshiler de N.Bekbergenovti azaptaý áreketin kórmegendigin jetkizdi.

J.Kóshekbaev jazasyn óteý kezinde ózin teris jaǵynan kórsetip, ishki tártip talaptaryn oryndamaǵan. Osy merzimde alty ret tártiptik jaýapkershilikke tartylsa, sonyń ekeýin RÝ-170/2 mekemesinde alǵan.

Bıylǵy 9 aqpanda oblys prokýratýrasynyń arnaıy prokýrorlary sotqa deıingi tergep-tekserýdi QR QPK 35-baby 1-bóligi 2-tarmaǵyna (qylmys quramynyń bolmaýy) sáıkes toqtatty.

Eske sala keteıik, J.Kóshekbaev Taraz qalalyq №2 sotynyń 2014 jylǵy 8 qyrkúıektegi úkimimen QR QK 179-baby 3-bóligi «v» tarmaǵyna sáıkes, ıaǵnı iri kólemdegi múlikti urlaý maqsatymen qaraqshylyq shabýyl jasaǵany úshin 9 jyl bas bostandyǵynan aıyrý jazasyn jalpy tártiptegi túzetý mekemesinde óteýge sottalǵan bolatyn.