Oralda «Jaıyqmunaıdyń» 339 mln teńge monopolııalyq kirisi tárkilendi

ORAL. QazAqparat - Oral qalasynyń mamandandyrylǵan ákimshilik soty monopolııaǵa qarsy zańnamany buzǵan «Jaıyqmunaı» JShS-yna qatysty QR Ákimshilik quqyqbuzýshylyq kodeksi 159-baby 3-babyna sáıkes qozǵalǵan iske núkte qoıdy, dep habarlaıdy «QazAqparat» tilshisi.

BQO sotynyń baspasóz qyzmetinen túsken málimetke qaraǵanda, atalmysh seriktestik óńirde gaz jelisi uıymdary arqyly suıytylǵan munaı gazyn jalǵyz óndirýshi ári jetkizýshi bolyp tabylady. Seriktestik merdigerlik qyzmetter týraly «Neftstroıservıs» JShS-men túrli qyzmetter boıynsha kelisimshat jasasqanyna qaramastan, 2016 jyldyń aqpanynan bastap gaz jelisi uıymdaryna suıytylǵan munaı gazyn qosymsha quıý qyzmeti boıynsha qosymsha tólem mindettegen. Sonyń saldarynan oblysta gazdyń bólshek saýda baǵasy artqan. Osylaısha, zańmen tyıym salynsa da, gaz jelisi uıymdary «Jaıyqmunaıǵa» táýeldi bolyp, qosymsha tólem tólegen.

Esepteýlerge sáıkes, 2016 jyldyń aqpanynan qarashasyna deıin suıytylǵan munaı gazyn negizsiz májbúrlep quıý qyzmeti nátıjesinde alynǵan tabys 529 322 115 teńgeni quraǵan. Quıý qyzmetteri úshin negizsiz aqy alý saldarynan alynǵan monopolııalyq tabys 339 468 661 teńgege jetken.

Іs materıaldaryn zerdeleı kele, sot «Jaıyqmunaı» JShS-ny kináli dep taýyp, 339 468 661 teńge monopolııalyq tabysyn memleket paıdasyna tárkilep, monopolııalyq qyzmetti júzege asyrý nátıjesinde alynǵan tabystan 5 paıyz kóleminde 26 466 105 teńge ákimshilik aıyppul saldy.

Qaýly zańdy kúshine engen joq.