Oralda jas hokkeıshiler oıyn kezinde tóbeles shyǵardy

<p>ORAL. KAZINFORM &ndash; Oral qalasyndaǵy jabyq muz aıdyny sport saraıynda shaıbaly hokkeıden Qazaqstan jastar lıgasynyń jergilikti &laquo;ıAstreby&raquo; men atyraýlyq &laquo;Jas batyr&raquo; komandalarynyń matchynda oıynshylar tóbelesti.</p>

Instagram áleýmettik jelisinde taralǵan beınejazbadan málim bolǵanyndaı, borttyń syrtynda bolǵan hokkeıshiler bir-birine judyryq siltegen.

Málimet kózine qaraǵanda, sodan keıin olardyń komandalastary arashalaýǵa umtylǵan. Minbedegi adamdar da aralasqan.

Match 3:0 esebimen oraldyqtardyń paıdasyna aıaqtalǵan.

Qysqy sport túrleri boıynsha oblystyq balalar-jasóspirimder sport mektebiniń dırektory Aleksandr Karakýshıevtiń túsindirýinshe, ekinshi kezeńniń aıaqtalýyna sanaýly mınýttar qalǵanda, ár komandadan bir-bir oıynshydan bas tóreshiniń sheshimimen básekeniń sońyna deıin aıdynnan qýylǵan.

«Eki oıynshy kıimderin aýystyryp kelgennen keıin bir-birimen tóbelesken. Olardy aıyrýǵa taǵy bireýi kirisken. Arnaıy jasaq jaýyngerleri oıynshylardyń arasynda bolǵan janjaldy der kezinde basty», - dedi A.Karakýshıev.

BQO polıtsııa departamentiniń baspasóz qyzmeti 18 aqpan kúni bolǵan oqıǵany rastap, atalmysh saraıda qoǵamdyq tártipti saqtaýǵa polıtsııa qyzmetkerleriniń tartylǵanyn jetkizdi.

«Anyqtalǵanyndaı, aıdynnan qýylǵannan keıin komandalardyń birneshe oıynshysy tóbelesken. Olardy polıtsııa qyzmetkerleri aıyrdy. Komandalarmen profılaktıkalyq áńgime júrgizildi», - dep habarlady vedomstvodan.