Oralda jańa jyl qarsańynda 360 otbasy baspanaly boldy
Úılerdi saltanatty tapsyrý rásimine qatysqan oblys ákimi Narıman Tóreǵalıev turǵyndardy aldaǵy jańa jyl merekesimen quttyqtady.
«Memleket basshysy Qasym-Jomart Toqaev óz Joldaýlarynda halyqtyń ál-aýqaty men ómir súrý sapasyn arttyrý basty mindet ekenin atap ótti. Osy oraıda ár otbasyn qoljetimdi turǵyn úımen qamtamasyz etýge baǵyttalǵan bastamalar asa mańyzdy. Jańadan berilgen úsh úıde barlyǵy 360 páter bar. Páterler „Otbasy bank“ AQ arqyly turǵyn úıge muqtajdar kezeginde esepte turǵan azamattarǵa jeńildetilgen paıyz arqyly berilýde. Qazirgi tańda Oralda memlekettik baǵdarlamalar boıynsha 14 kópqabatty turǵyn úıdiń qurylysy júrgizilýde. Ótken jyly Úkimettiń „Turǵyn-úı kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasyn bekitý týraly“ qaýlysy shyqty. Soǵan sáıkes Oralda úı kezeginde turǵandar úshin 25 páter satyp alyndy. Aldaǵy jyly bul jumysty jalǵastyryp, 130-daı jańa páterdi satyp alý kózdelýde», dedi óńir basshysy.
«Turǵyn-úı kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy» aıasynda júzege asyrylyp jatqan jobaǵa sáıkes atalmysh úılerdegi páterler jyldyq syıaqy mólsherlemesi eki paıyzdan aspaıtyn ıpotekalyq nesıe berý arqyly satylǵan.
Bul jobaǵa qatysýǵa bıyl qyrkúıek aıynda osynshama adamnan ótinish qabyldanyp, maquldandy. Olardyń qatarynda múgedek bala tárbıelep otyrǵan jáne kópbalaly otbasylar, jetimder men ata-anasynyń qamqorlyǵynsyz qalǵandar, birinshi jáne ekinshi toptardaǵy múmkindigi shekteýli jandar bar.
«Óte rızamyz. Jańa jylmen jetken qonystoı boldy. Osy sátti asyǵa kútkenbiz. Búgin otbasymyz shattyqqa kenelip jatyr. Elimizde turǵyn úı kezeginde turǵan otbasylarǵa jańa múmkindikter jasalyp jatyr. Mundaı baǵdarlamalardyń aıasy keńeıe bersin! Elimiz aman, táýelsizdigimiz máńgi bolsyn!» deıdi kópbalaly ana Meıramgúl Orazálıeva.
Oral qalasy boıynsha memlekettik turǵyn úı qorynan beriletin páterler kezegine 22 myńnan astam adam tirkelgen.
Oblys ortalyǵynda jańadan boı kóterip kele jatqan «Aqjaıyq» shaǵynaýdanynda da qurylys qyzý júrgizilip jatyr. Munda 25 kópqabatty turǵyn úı qurylysy josparlanǵan. Onda jalpy sany 5 myńǵa jýyq páter bolady.
Qazirgi tańda bul aýmaqta 11 turǵyn úı salynýda.