Oralda jańa kópirde salynyp jatqan jıektas talapqa saı kelmeıdi
2018 jyly qarashada bastalǵan «Omega» zaýyty aýdanyndaǵy kópir qurylysy 36 aıǵa eseptelgen.
Bul asa mańyzdy jobaǵa «KPO b.v.» kompanııasy esebinen 5,2 mlrd teńge bólinse, bas merdigeri – «KA-stroı LTD» JShS.
«KA-stroı LTD» JShS ókiliniń sózine qaraǵanda, kúni búgin kópir qurylysynyń 95 paıyzy oryndalǵan. Sondyqtan ony merziminen buryn, aldaǵy shilde aıynda bitirý kózdelip otyr.
Qazirgi kezde jalpy uzyndyǵy 988 metr bolatyn kópirde usaq túıirshikti asfalt tóseý, karnızdik blok ornatý, tosqaýyl qorshaýyn jetkizý jumystary júrgizilýde.
Qurylys barysymen tanysqan oblys basshysy turǵyndar ózine vatsap arqyly qaladaǵy jıektastardyń sapasy nashar ekendigin jıi jazatynyn aıtyp, osy kópirde qoldanylyp jatqan atalmysh qurylys materıalynyń úlgilerin synap kórýdi usyndy.
Nátıjesinde «Dvın-Stroı» seriktestiginiń 300 dana jıektasynyń 61-i ǵana talapqa sáıkes bolyp shyqty.
«Nege sapaly materıaldardy paıdalanbasqa! Álııa Moldaǵulova kóshesinde osy fırmanyń jıektastary salynǵan, ol qazirdiń ózinde úgitilip jatyr. Tek osy kópir ǵana emes, qalada salynǵan barlyq jıektasty tekserý kerek. Eger talapqa saı kelmese, aýystyrý qajet», dedi Ǵ.Esqalıev.
Sonymen qatar, oblys basshysy Máskeý kóshesinde káriz kollektoryn jóndeý, I.Konıahın kóshesindegi joldy qaıta jańartý jumystarymen de tanysyp, merdigerlerge, eń bastysy, sapaǵa mán berýdi tapsyrdy.
Eske sala keteıik, budan eki jyl buryn Oralda Depo kópiriniń ashylǵanyn jazǵan bolatynbyz. Onyń da merdigeri «KA-stroı LTD» kompanııasy edi.