Oralda jańa býlvar ashyldy
Sonyń biri №4 jáne №6 shaǵynaýdandar arasynda jaıaý júrginshilerge arnalǵan býlvar paıdalanýǵa berildi. Onyń ashylý rásimine qatysqan qala ákimi Murat Muqaev jurtshylyqty merekemen quttyqtap, Elbasy tapsyrmasyna sáıkes shahardy abattandyrý jumystary da turaqty júrgizilip jatqanyn jetkizdi.
Jalpy aýmaǵy 8,5 myń sharshy metrdi quraıtyn býlvardyń 3,5 myń sharshy metrine órnektas, 1,5 myń sharshy metrine asfalt tóseldi. 80 kóshe shamy ornatylyp, júzden astam shyrsha otyrǵyzyldy. Jańa nysanǵa 111 mln teńge jumsaldy. Osylaısha, buryn shańy burqyrap, bos jatqan jer qala turǵyndary demalatyn orynǵa aınaldy.
Oral qalasynda kúni búgin 54 saıabaq bolsa, aldaǵy jyly taǵy beseýi salynyp, basqa shaǵynaýdandar abattandyrylatyn bolady. Qazirgi kezde bul nysandardyń jobalyq-smetalyq qujattamasy jasalýda. Oǵan qosa «Stroıtel» shaǵynaýdany mańynda Jasyl býlvar jobasy da memlekettik saraptamadan ótti.
Merekege oraı qalaǵa qarasty Bortaý (Melovye Gorkı) kentinde jańa sport alańy ashyldy. Munda endi turǵyndar fýtbol, voleıbol, basketbol syndy sport túrlerimen aınalysa alady. Jaryqtandyrylyp, abattandyrylǵan alańda jarys ta ótkizýge bolady. Nysan qurylysyna 14,491 mln teńge bólindi.
Jalpy, bıyl oblys ortalyǵynda 20 sport jáne balalar alańy iske qosylmaqshy. Bul 12 myńnan astam adamnyń sportty serik etýine múmkindik beredi. 2018 jyly Oralda osyndaı taǵy 22 nysan salý josparlanyp otyr.