Oralda zeınetkerler kólik kartalaryn ala almaı júr
Oralda bıylǵy 1 qańtardan bastap jolaqy baǵasy ózgergen bolatyn. Qala ákimdiginiń qaýlysyna sáıkes turǵyndar qoǵamdyq kólikte qolma-qol aqshamen 200, qolma-qol aqshasyz 100 teńgeden tóleýge kóshti. Zeınetkerler 50 paıyz jeńildikpen tóleıtinder qataryna engizildi. Bul úshin kólik kartalaryn alýy kerek. Osyǵan baılanysty «Smart Qala Oral» JShS áýeli kólik kartalary 3 qańtardan bastap beriletinin habarlaǵanmen, bul jumys keıinge qaldyryldy. Qalada kólik kartalary 8 qańtardan alty núktede berile bastaǵanymen, zeınetkerler bárinde uzyn-sonar kezekke tap boldy.
«Zachagan kentindegi «Jáńgir han» saýda úıinde kólik kartalary satylyp jatyr degendi estip, 9 qańtar kúni saǵat 11.00-den kete bardym. Kezekte turǵanmen, túste karta bitip qalyp, taǵy kúttik. Áıteýir tústik taǵam ishpesem de, saǵat 16.00-ge taman alyp shyqtym. Odan keıin de kún saıyn kezek. Zeınetkerlerdiń aýyryp-syrqaıtyny bar, júrip-turýy qıyn, nege budan da kóp jerde uıymdastyrylmaıdy?» - deıdi qala turǵyny Baqyt Ótegenova.
«Jáńgir han» saýda úıinde 12 qańtar kúni de túske deıin zeınetkerler kezekte turǵanymen, karta joq degennen keıin tarap jatty. «Smart Qala Oral» JShS basshysy Záýre Mosqalbaeva Almatydan keletin kartany kútip, áýejaıda turǵanyn aıtty.
«Biz kartany daıyndap, Almatyǵa jiberemiz, onda tigiledi. Aýa raıyna baılanysty ushaqtar da ýaqytyly kelip jatqan joq. Kidiris bolyp jatqany ras. Jalpy, kartalar qalada alty núktede, avtovokzal men «Jáńgir han» saýda úıinen basqa Isataı-Mahambet kóshesi boıyndaǵy halyqqa qyzmet kórsetý ortalyǵynda, Qurmanǵazy kóshesinde halyqty jumyspen qamtý ortalyǵynda, «Astana» jáne 9-shaǵynaýdanda «Altyndar» saýda úıinde satylady», dedi Z.Mosqalbaeva.
Eske sala keteıik, budan buryn Oral qalasynda avtobýsta jol júrý aqysy ózgergenin jazǵan bolatynbyz.