Oralda zeınetkerdi tonaǵan kúdikti ustalyp, ızolıatorǵa qamaldy

ORAL. QazAqparat – Oralda aqsha aıyrbastaýǵa shyqqan 77 jastaǵy keıýanany tonap ketken, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, 20 aqpan kúni túski mezgilde 77 jastaǵy zeınetker áıel saýda úıindegi aqsha aıyrbastaý pýnktine kelip, rýbldi aıyrbastamaqshy bolǵan.

«Keıýana kúnde jańartylyp turatyn elektrondy tabloǵa qarap, aqsha kýrsyna úńiledi de, keıin kelemin dep sheshedi. Onyń qımyldaryn jiti baıqap turǵan er adam kóshege qaıta shyqqan zeınetkerdiń artynan ilesip otyrady. Úıine deıin jetip, kireberiske kele bergende, basynan uryp qulatyp, qolyndaǵy paketin tartyp alady. Paket ishinde azyq-túlik pen aıyrbastamaqshy bolǵan 200 myń teńge kólemindegi aqshasy salynǵan ámııany bolǵan. Oral qalasy polıtsııa basqarmasy Abaı polıtsııa bóliminiń qyzmetkerleri jedel izdestirý is-sharalary barysynda 47 jastaǵy qala turǵynyn anyqtap, ustady. Er adam urlanǵan aqshany jumsap úlgergen. Kúdikti ýaqytsha ustaý ızolıatoryna qamaldy. Atalǵan oqıǵa boıynsha QR QK 191-baby 2-bóligine sáıkes (tonaý) sotqa deıingi tergeý amaldary júrgizilip jatyr. Bul bap boıynsha aıypty dep tanylǵan adamnyń múlki tárkilenip, úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», - dep habarlady departamentten.

Eske sala keteıik, budan buryn Batys Qazaqstanda jasóspirimder qylmysy eki ese óskenin jazǵan bolatynbyz.