Oralda voleıboldan erler arasynda Ulttyq lıga oıyndary ótip jatyr

<p>Oral qalasynda voleıboldan erlerdiń Ulttyq lıga komandalary arasynda HHHІІ Qazaqstan chempıonatynyń oıyndary ótip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Oral» sport kesheninde alǵashqy bolyp «Ushqyn-Kókshetaý» jáne «Býrevestnık» (Almaty) komandalary shyqty.

Munda almatylyqtar aıqyn basymdylyq tanytyp, 3:0 (25:22, 25:23, 25:18) esebimen utty.

Esesine budan keıingi qos kezdesý asa tartysty ótip, bes setke sozyldy. «Esil» (SQO) kambek jasap, «Atyraýdy» 3:2 (18:25, 19:25, 25:23, 25:19, 16:14) esebimen qapy qaldyrdy.

Aqtóbelikter «Jetisý jastaryn» 3:2 (25:23, 19:25, 20:25, 25:23, 18:16) esebimen tize búktirdi.

Beısenbi kúngi ortalyq match jergilikti «Jaıyq» pen el chempıony «Pavlodar» arasynda ótti.

Bul ekinshi týrdan keıinge qaldyrylǵan báseke edi.

Birinshi partııada pavlodarlyqtar (25:19) sheberlik tanytsa, ekinshi sette oraldyqtar tarazy basyn teńestirdi — 25:22.

Budan keıin Vıktor Kozıktiń shákirtteri eki partııada alda turyp, sońǵy sátterde ese jiberip aldy — 24:26, 24:26. Qorytyndy esep — 3:1, «Pavlodardyń» paıdasynda.

Týrnır kestesinde «Jaıyq» burynǵysynsha úshinshi satyda qalsa, «Pavlodar» 32 upaımen ekinshi oryndaǵy «Tarazdan» uzaı tústi.

Oraldaǵy úshinshi týr oıyndary 19 qańtarda máresine jetedi.

Eske sala keteıik, budan buryn voleıboldan el chempıonatynda «Pavlodardyń» jekedara kósh bastaǵanyn jazǵan bolatynbyz.