Oralda Ulttyq ulannyń jas leıtenanttary bas qosty

ORAL. QazAqparat - Bıyl QR Ulttyq ulany áskerı ınstıtýtyn jáne Reseı Federatsııasyndaǵy osyndaı oqý ornyn bitirgen otyzdan astam leıtenant «Batys» óńirlik qolbasshylyǵynyń Aqtóbe, Atyraý, Aqtaý, Jańaózen jáne Oral qalasynda ornalasqan áskerı bólimderin tolyqtyrdy. Olar «Batys» óńirlik qolbasshylyǵy basqarmasy bazasynda oqý-ádistemelik jıynda bas qosty, dep habarlaıdy «QazAqparat» tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, jıyn maqsaty - jas sardarlardy jańa qyzmetti qabyldaýda qajetti bilimmen qarýlandyrý.

Jıyn basshysy, QR Ulttyq ulany «Batys» óńirlik qolbasshysynyń orynbasary, polkovnık Pavel Sıtnıkov ınstıtýt túlekterin áskerı bólimderdiń erekshelikterimen, bıylǵy birinshi jartyjyldyqtaǵy qyzmet nátıjelerimen tanystyryp, saýaldaryna jaýap berdi.
 

Jıyn barysynda jas sardarlarmen «Batys» óńirlik qolbasshysy, general-maıor Álibek Serálıev kezdesip, olarǵa barlyq jaǵdaıdyń jasalatynyn jetkizip, jaýapty qyzmetterin minsiz atqara bilýlerine tilektestigin bildirdi.

Úsh kúndik jıyn kezinde jas sardarlarǵa basty qujattardyń negizgi talaptary túsindirilip, olardyń bilim deńgeıi tekserildi.

Leıtenanttar jıynnan keıin ózderi qyzmet etetin áskerı bólimderge bet aldy.