Oralda Ulttyq ulanǵa jańadan qosylǵandar ant berdi
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, bıyl atalmysh bólimge Túrkistan, Aqmola, Qyzylorda, Qaraǵandy jáne Almaty oblystarynan 184 jas jańadan kelgen bolatyn. Olardyń bári de jas jaýynger kýrsynan sátti ótti.
Saltanatty jıynǵa sarbazdardyń ata-analary men týysqandary, dos-jarandary keldi.
Otanǵa adal qyzmet etýge ant bergenderdi «Batys» óńirlik qolbasshysynyń orynbasary, polkovnık Pavel Sıtnıkov, Oral garnızonynyń áskerı prokýrory, ádilet polkovnıgi Altynbaı Raev, «Batys» óńirlik qolbasshylyǵy ishki áskerler ardagerleri keńesiniń tóraǵasy, doǵarystaǵy polkovnık Baqytjan Berdıev jáne basqalar quttyqtady.
«Ant berý - ár jaýyngerdiń ómirinde este qalarlyqtaı eleýli kúnniń biri. Ulandar áskerı qyzmet qataryna qosyla otyryp, qajetti bilim, daǵdyny meńgerip, shyńdala túsedi. Olarǵa myqty densaýlyq, tabandylyq tileımiz. Ata-analaryna óz uldaryn otanshyldyq rýhta tárbıelegenderi úshin alǵys aıtamyz», dedi polk komandıri, podpolkovnık Maqsat Bóltirikov.
Sharadan keıin ata-analar uldary turatyn oryndarmen tanysyp, polk basshylyǵymen kezdesip, túrli saýaldaryna jaýaptar aldy.