Oralda Ulttyq ulan jaýyngerleri úıinde oqshaýlanǵan qarııalarǵa kómektesip júr

ORAL. QazAqparat – Oralda Ulttyq ulan jaýyngerleri koronavırýsqa baılanysty úılerinde oqshaýlanǵan jasy ulǵaıǵan jandarǵa kómektesýde, dep habarlaıdy QazAqparat tilshisi.

QR Ulttyq ulany «Batys» óńirlik qolbasshylyǵynan podpolkovnık Erbolat Sultanov málim etkendeı, 5517-áskerı bóliminiń qyzmetkerleri de indetke qarsy kúres kezinde eriktiler qataryna qosyldy.

Sanıtarlyq-epıdemıologııalyq talaptardy saqtaı otyryp, Ulttyq ulan jaýyngerleri «Biz birgemiz!» qaıyrymdylyq sharasy aıasynda Qyzyl Jarty aı qoǵamy oblystyq fılıalymen birge qarııalarǵa áleýmettik kómek kórsetti.

Sarbazdar bir kúnniń ishinde 20-dan astam adamǵa un, jarma, et, sút ónimderi, qant jáne basqa asa qajetti taýarlar jetkizdi.

«Koronavırýs, ásirese, jasy ulǵaıǵan jandar úshin qaýipti. Ulttyq ulan jaýyngerleri qolushyn sozǵandar arasynda zeınetkerlermen qatar túrli aýrýmen emdeý mekemesinde tirkeýde turǵan adamdar bar. Іndetke baılanysty olar da oqshaýlanyp, kisi kóp jınalatyn qoǵamdyq oryndarǵa barmaýy kerek. Ár saparǵa shyǵar aldynda sarbazdarǵa nusqaý berilip, qyzýlary ólshenedi. Mindetti túrde betperde, qolǵap kıedi, dezınfektsııalyq quraldarmen qamtamasyz etilgen. Karantın kezinde ózimiz qorǵana otyryp, kómekke muqtaj qarııalarǵa járdemdesýimiz qajet», dedi 5517-áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Jánibek Sársenov.