Oralda Ulttyq ulan jaýyngerleri memlekettik nagradalarmen marapattaldy
«Batys» óńirlik qolbasshylyǵy baspasóz qyzmetiniń bastyǵy, podpolkovnık Erbolat Sultanovtan túsken málimetke qaraǵanda, aldymen áskerı bólimderdiń týlary ákelinip, memlekettik Ánuran oryndaldy.
«Batys» óńirlik qolbasshysy, general-maıor Qaırat Aqtanovtyń atap ótkenindeı, bıyl - barsha qazaqstandyqtar úshin erekshe jyl. Elbasymyzdyń bastaýymen kóptegen tabystarǵa qol jetkizgen táýelsiz elimiz óz azattyǵynyń 25 jyldyǵyn keń kólemde atap ótip otyr. Ulttyq ulan jaýyngerleriniń basty mindet-boryshy da Otanǵa qaltqysyz qyzmet etý.
Jıyn barysynda QR Іshki ister mınıstriniń, QR Ulttyq ulany bas qolbasshysynyń jáne «Batys» óńirlik qolbasshysynyń quttyqtaýlary men merekelik buıryqtary oqylyp, soǵan sáıkes áskerı qyzmetkerlerdiń úlken toby medal, gramotalarmen, baǵaly syılyqtarmen marapattaldy. Memleket basshysynyń Jarlyǵyna sáıkes «Batys» óńirlik qolbasshylyǵynyń bes birdeı jaýyngeri úshinshi dárejeli «Aıbyn» ordenin, «Jaýyngerlik erligi úshin» medalin ıelengeni belgili boldy. Mınıstrdiń buıryǵyna oraı jedel basqarma bastyǵy, podpolkovnık Bolat Musabekovke merziminen buryn polkovnık áskerı sheni berildi. Al Ulttyq ulan bas qolbasshysynyń buıryǵymen BQO mádenıet, muraǵattar jáne qujattama basqarmasynyń basshysy Dáýletkereı Qusaıynov ekinshi dárejeli «Ulttyq ulannyń úzdigi» tósbelgisimen marapattaldy. D.Qusaıynov óńir basshysynyń atynan Ulttyq ulan jaýyngerlerin elimizdegi eń ulyq meırammen quttyqtap, oblys ákiminiń alǵyshattaryn tabys etti.
Saltanatty jıyn sońy Jastar mádenıet úıi men Ǵ.Qurmanǵalıev atyndaǵy oblystyq fılarmonııa ártisteri qoıǵan merekelik kontsertke ulasty.