Oralda úleskerlerdiń qarjysyn zańsyz tartqan qurylys kompanııalaryna aıyppul salyndy
Oral qalasy prokýrorynyń orynbasary Almas Ońaevtyń málim etkenindeı, taldaý barysynda osyndaı 24 qurylys salýshy anyqtaldy.
Onyń sózine qaraǵanda, sonyń ishinde prokýrorlyq qadaǵalaý aktisi boıynsha 10 zańdy tulǵa ákimshilik jaýapkershilikke tartylyp, 5 mln astam teńge aıyppul óndirildi.
«Qala prokýratýrasy «Stroı Tehno Grýpp» JShS, «SVS Batys» JShS, «ATM Group Kazakhstan» JShS, «BıznesPlan» JShS, «SaparStroıAzııa» JShS, «KMT-SıtıStroı» JShS, «Alim Construction LTD» JShS, «ATJ2» JShS-nyń zańnamanyń belgilengen talaptaryna qaıshy, kóp qabatty turǵyn úıdi salý kezinde tıisti ruqsatsyz nıet shartyn jasasý jáne avans alý jolymen turǵyn úıdi satý úshin jeke tulǵalardyń aqshalaı qarajatyn tartqanyn anyqtady. Qala prokýratýrasynyń qadaǵalaý aktisin qaraý nátıjesinde jergilikti atqarýshy organmen atalǵan seriktestikterge QR Ákimshilik quqyq buzýshylyq týraly kodekstiń 320-babymen ákimshilik hattama toltyrylyp, árqaısysynan 517,5 myń teńgeden óndirildi. Oǵan qosa kelisimshart jasasý toqtatyldy», deıdi A.Ońaev.
Onyń aıtýynsha, úlestik qatysýdyń basty artyqshylyǵy – daıyn múlikke qaraǵanda qoljetimdi baǵa. Alaıda eger qurylys salýshy men úlestik qurylys obektisi tekserilmese, úı satyp alý qıynǵa soǵýy múmkin.
Qurylys kezeńinde turǵyn úı satyp alǵysy keletin úleskerler óz quqyqtaryn bilmegendikten, qıyndyqqa tap bolýy yqtımal. Qurylys salýshyda kelesi qujattardyń bolýyn tekserý qajet:
- qurylysqa ruqsat,
- jer ýchaskesine quqyq belgileıtin qujattar,
- jobalaý-smetalyq qujattama,
- qurylysqa qatysýshy kompanııalardyń lıtsenzııalary,
- kompanııanyń jarǵysy jáne quryltaı sharty.
«Salynyp jatqan turǵyn úıdi satyp almas buryn, qurylys salýshylardan barlyq ruqsat qujattaryn talap etip, aqparatty eki ret tekserý qajet. Sondaı-aq salynyp jatqan turǵyn úıdi satyp alý kezinde úlestik qatysý sharty ǵana jasalýy tıis (turǵyn úı qurylysyna úlestik qatysý týraly sharttyń úlgilik nysany Qazaqstan Respýblıkasy Ulttyq ekonomıka mınıstriniń 2016 jylǵy 28 shildedegi №345 buıryǵymen bekitilgen). Úlestik qatysý shartyna qol qoıylǵannan keıin qurylys salýshy qujatty ákimdikte «Qazreestr» biryńǵaı aqparattyq júıesi arqyly tirkeýge mindetti», deıdi qala prokýrorynyń orynbasary.
Onyń túsindirýinshe, shart tirkelgen kezde tólem úshin negiz bolatyn úzindi kóshirme beriledi. 2023 jyly «Turǵyn úı portaly» bazasynda úleskerlerdiń jeke kabıneti iske qosyldy, onda úlestik qurylysqa qatysýshy óziniń úlestik qatysý shartyn tirkeý faktisin jáne úzindi kóshirmeniń bolýyn teksere alady.
Barlyq tekserýlerden keıin de kepildik jaǵdaıy oryn alýy múmkin, mysaly, engizý merzimi buzylady, úleskerlerdiń qarajatyn maqsatsyz paıdalaný anyqtalady, qurylys salýshy bankrot dep tanylady.
Mundaı jaǵdaılarda «Qazaqstandyq turǵyn úı kompanııasy» AQ turǵyn úı qurylysyn aıaqtaýdy qarjylandyrady jáne úleskerge óz páterin alýǵa kepildik beriledi.