Oralda tórt bólmeli úı órtenip, kópbalaly otbasy baspanasyz qaldy

<p>ORAL. KAZINFORM &mdash; Oral qalasynda &laquo;Zachaganskıı&raquo; baý-baqsha seriktestiginde turǵyn úı otqa orandy.</p>

BQO TJ departamentiniń baspasóz qyzmetinen málim etkenindeı, oqıǵa 20 tamyz kúni saǵat 12.35-te Jetisý kóshesi 6-mekenjaıda boldy.

«Órt sóndirýshiler saǵat 12.47-de jetti. Turǵyn úıdegi órt aýmaǵy 100 sharshy metrdi qamtydy. Zardap shekkender joq. «Tilsiz jaý» saǵat 13.02-de oqshaýlanyp, 13.21-de aýyzdyqtaldy. Jalyndy sóndirýge 13 adam, 4 tehnıka jumyldyryldy», - dep habarlady vedomstvodan. 

Tórt bólmeli úıi órtengen otbasy baspanasyz qaldy.

«Joldasym Aqnazar Ǵumarov ekeýmiz tórt ul tárbıelep otyrmyz. Úlkeni 16 jasta, ekeýi – mektep oqýshysy, kishisi bir jarym jasta. 2020 jyly Bókeı ordasy aýdany Muratsaı aýylynan kóship kelip, qalaǵa ornalasyp edik. Kúni búgin týysymyz Maǵjan Eltaıulynyń úıin panalaýdamyz», - dedi Kazinform tilshisine Shynargúl Januzaqova. 

Atalǵan otbasynyń tanystary qazirgi kezde Kaspıge Shynargúldiń 8-705-802-96-33 nómiri boıynsha kómek qarjysy jınalyp jatqanyn jetkizdi.

BQO TJ departamenti bastyǵynyń orynbasary Anar Bısenovanyń aıtýynsha, bıylǵy jeti aıda oblys aýmaǵynda 348 órt oqıǵasy tirkelip, saldarynan 3 adam qaza tapty. 6 adam jaraqat aldy. Órtterden 461 mln 406,6 myń teńge materıaldyq shyǵyn keltirilgen.

«Órttiń shyǵýynyń negizgi sebepteri elektr jabdyqtaryn paıdalanýda qaýipsizdikti saqtamaý (188 oqıǵa), otpen abaı bolmaý (72), peshti qoldanýda ereje buzý (39), qasaqana órteý (18) jáne balalardyń otpen oınaýy (5) bolyp otyr», - dedi A.Bısenova.

Eske sala keteıik, budan buryn Batys Qazaqstanda órtengen úı ishinde quran janbaı qalǵanyn jazǵan edik.