Oralda tilshi Luqpan Ahmedııarovqa jasalǵan shabýyl boıynsha qylmystyń beti ashyldy - QR Bas prokýratýrasy

ASTANA. 28 jeltoqsan. QazAqparat - Bıylǵy sáýirde «Oral aptalyǵy» gazetiniń tilshisi Luqpan Ahmedııarovqa jasalǵan shabýyl boıynsha qylmystyń beti ashyldy. Bul týraly búgin Astanada ótken brıfıngte Bas prokýratýranyń resmı ókili  Nurdáýlet Súıindikov málim etti.

«Barlyq 3 tikeleı oryndaýshy, sondaı-aq buryn sotty bolǵan jergilikti «Taıpaqtyqtar» uıymdasqan qylmystyq tobynyń múshesi bolyp shyqqan shabýyldyń uıymdastyrýshysy anyqtaldy jáne ustaldy. Kúdiktilerdiń kinálaryn moıyndaý jónindegi jaýaptary Ahmedııarovpen bolǵan bettestirýmen, alynǵan travmatıkalyq tapanshamen, sondaı-aq is boıynsha jınaqtalǵan basqa da dáleldemelerdiń jıyntyǵymen rastaldy»,-dedi resmı ókil.

N. Súıindikov búginde qamaýǵa alynǵan qylmystyń uıymdastyrýshysy jaýap berýden bas tartqanyn, tergeý qylmystyń nıetin jáne shabýylǵa yqtımal tapsyrys berýshini anyqtaýǵa baǵyttalǵan sharalardy jalǵastyryp jatqandyǵyn atap ótti.

Aıta keteıik, bıylǵy mamyrda Ahmedııarovqa shabýyl jasady degen kúdikpen qylmysty moınyna alǵan basqa eki azamat ustalǵan.

«Alaıda, prokýratýramen júrgizilgen tekserýmen oqıǵanyń qylmysty jasaý tásilinde, ýaqytynda jáne oqıǵanyń basqa da mán-jaılarynda aıqyn kelispeýshilikter anyqtaldy. Jábirlenýshi olardy shabýyl jasaýshylar retinde tanı almady. Osyǵan baılanysty olardyń moıyndaý týraly bergen jaýaptaryna qaramastan, prokýratýramen olardy qamaýdan bosatý jáne qylmystyq qýdalaýdy doǵarý týraly sheshim qabyldandy», - dep túsindirdi N. Súıindikov.