Oralda «Til - tutastyq týy» festıvali qorytyndylandy
Sharaǵa qatysqan oblys ákimi Altaı Kólginovtiń atap ótkenindeı, Qazaqstan táýelsizdik alǵannan bergi shırek ǵasyrdan astam ýaqyt ishinde alǵa nyq qadam bassa, sonyń bári - el birliginiń arqasy, Elbasy júrgizip kele jatqan sarabdal saıasattyń jemisi. Bıyl da elimiz úshin erekshe jyl bolyp otyr. Memleket basshysy «Rýhanı jańǵyrý» baǵdarlamasyn jarııa etip, aldaǵy baǵyt-baǵdarymyzdy aıqyn kórsetip berdi. Shyndyǵynda da rýhanı jańǵyrýsyz alǵa basý qıyn. Eldegi kelisim men yntymaqtyń nátıjesinde memlekettik baǵdarlamalar arqyly myńdaǵan jumys oryndary ashylyp, ınfraqurylym damyp, kóptegen kásiporyndar jumys jasap jatyr. Bir ǵana «Nurly jol» baǵdarlamasy arqyly oblysqa 28 mlrd teńge bólinip, sol qarjyǵa qyrýar sharýa atqarylýda. Mysaly, bıyl oblys kóleminde 500 shaqyrym jol jóndelýde. Oral qalasynyń ózinde bul maqsatqa 8,1 mlrd teńge bólinip, buryn-sońdy bolmaǵan jumys jasalýda. «Nurly jer» baǵdarlamasy aıasynda óńirde bıyl 1600 turǵyn baspanaly bolmaqshy.
«Rýhanı jańǵyrý» baǵdarlamasynyń basty maqsaty - halyqty biriktirý, tarıhymyzdy túgendep, bolashaǵymyzdy aıqyndaı túsý. Tek bizdiń óńirde ǵana seksennen astam ult ókilderi turady. Biz birtutas ultpyz. Osy rette memlekettik tilimizdiń barsha ult ókilderin uıystyrýdaǵy róli aıryqsha. Ahmet Baıtursynuly aıtqandaı, eldi saqtap qalatyn til. Til barda memleket te bar. Kóp til bilgenniń artyqshylyqtaryn Astanada ótken «EKSPO-2017» halyqaralyq kórmesi de dáleldep berdi. Ásirese, qazirgi jastarǵa kóbirek til meńgerip, jańa tehnologııalardy ıgerýge keńinen jol ashylyp otyr. Osy múmkindikterdi paıdalana bilgenniń keleshegi de jarqyn bolmaq.
Shara barysynda til janashyrlary oblys ákiminiń Alǵys hattarymen marapattaldy. Sondaı-aq túrli baıqaý jeńimpazdaryna oblystyq tilderdi damytý basqarmasynyń marapattary da tabys etildi.