Oralda Táýelsizdiktiń 25 jyldyǵyna oraı merekelik kontsert qoıyldy
Onda Aq Jaıyq jurtshylyǵyn oblys ákimi Altaı Kólginov quttyqtap, táýelsizdik jyldary ishinde óńirdiń qol jetkizgen tabystary mol ekendigin atap ótti. Mysaly, ishki aımaqtyq ónim 1 mlrd. teńgeden 1,7 trln. teńgege deıin ósse, ónerkásip óniminiń kólemi 400 mln. teńgeden 1,3 trln. teńgege deıin nemese 3 myń esege kóbeıdi. Elbasy tapsyrmasyna sáıkes qolaıly ınvestıtsııalyq ahýal týǵyzý baǵytynda da kóp jumys atqaryldy. Óńir ekonomıkasyna quıylatyn ınvestıtsııanyń 80 paıyzdan astamy jeke kásipkerliktiń úlesine tıedi. Barlyǵy 3 trln. 25 mlrd. teńge ınvestıtsııa tartyldy. Shaǵyn jáne orta bıznes jaqsy damyp keledi. Atap aıtqanda, osy salada óndirilgen ónim men kórsetilgen qyzmet kólemi tek sońǵy on jylda 2005 jylǵy 66,7 mlrd. teńgeden 2015 jylǵy 1 006,8 mlrd. teńgege deıin nemese 15 esege, al jumys jasaıtyndar sany 55,9 myńnan 106,0 myńǵa deıin (2 ese) artty. Aýyl sharýashylyǵy salasynda táýelizdik jyldary (1993-2015) jalpy ónim kólemi 6,8 mlrd. teńgeden 106,5 mlrd. teńgege (15 ese) jetti.
Óńirde 335 mlrd. astam teńgege 47 ınvestıtsııalyq joba júzege asyrylyp, sonyń nátıjesinde 2700-den astam jańa jumys orny ashyldy. Oblys halqynyń gazben qamtylýy 2002 jylǵy 44 paıyzdan bıyl 93 paıyzǵa jetti. Jumyssyzdyq máselesi josparly sheshilip keledi. Sońǵy on jylda 146 myńnan astam jańa jumys orny ashylyp, sonyń nátıjesinde jumyssyzdyq deńgeıi 2005 jylǵy 9 paıyzdan ótken jyly 4,9 paıyzǵa deıin (1995 jyly - 10,8 paıyz) tómendedi.
«Munyń bári - Elbasy saıasaty men memlekettiń jan-jaqty qoldaýynyń arqasy, óńir halqynyń jumyla jumys jasaýynyń jemisi. Bolashaqta bizdi budan da bıik belester kútip tur. Eń bastysy, Táýelsizdigimiz tuǵyrly, eldigimiz máńgilik bolsyn!» dedi oblys basshysy.
Budan keıin oblystyń shyǵarmashylyq ujymdary men belgili ártisteri óz ónerlerin kórsetti. Teatrlandyrylǵan kórinister, asqaqtaǵan áýen, myń buralǵan bı, kúmbirlegen kúıler mereke shyraıyn asha tústi.