Oralda «Táýelsizdik tolǵaýy» atty halyqaralyq aqyndar aıtysy márege jetti
Aıtýly dodaǵa Qazaqstan ǵana emes, sondaı-aq Qytaı, Mońǵolııa, Qyrǵyzstan elderiniń atynan kelgen saıyskerler qatysyp, baq synady.
Aıtysty belgili aqyn, «Parasat» ordeniniń ıegeri, Qazaqstannyń eńbek sińirgen qaıratkeri, Halyqaralyq aıtys aqyndary men jyrshy-termeshiler odaǵynyń tóraǵasy Júrsin Erman júrgizdi.
Batys Qazaqstan oblysynyń ákimi Ǵalı Esqalıev barsha jınalǵan qaýymdy Táýelsizdik toıymen quttyqtap, aıtyskerlerge alǵysyn bildirip, bıyl jetpis jastyń bıigine shyqqan J.Ermannyń ıyǵyna shapan japty.
Aıtys barysynda Aıbek Qalıev, Bekarys Shoıbekov, Rústem Qaıyrtaı, Jansaıa Mýsına syndy tanymal aqyndarmen qatar jastar da, barlyǵy 22 saıysker sahnaǵa shyqty.
Solardyń ishinde osyndaı deńgeıdegi aıtysqa alǵash ret qosylǵan batysqazaqstandyq Meıirman Shákenov atyraýlyq Syrymbek Sársenbaevpen ádemi aıtystyń úlgisin kórsetti. Qyrǵyz aqyny Azamat Bolgonbaevpen sóz saıystyrǵan taǵy bir batysqazaqstandyq Jarqynbek Shyntaevty atap ótýge bolady.
Bul aıtystaǵy taǵy bir jańalyq, qyrǵyz eliniń jas manasshysy Azız Bıımyrza ýýlýnyń áıgili «Manas» jyrynan úzindi oryndaýy boldy. Sondaı-aq tanymal epık jyrshy, qyzylordalyq Berik Júsipov te óz ónerin kórsetti.
«Mine, bıyl Táýelsizdiktiń 30 jyldyǵyn keńinen atap ótýdemiz. Azattyqqa qol jetkizýimizge Jeltoqsan oqıǵasyna qatysqan jastardyń úlesi ushan-teńiz. Aqıyq aqyn Juban Moldaǵalıev Jazýshylar odaǵynda ótken, Kolbın qatysqan jıynda «Mundaı masqarany, mundaı qorlyqty kórgenimshe, maıdan dalasynda qalýym kerek edi», dep jastarǵa arasha túsip, batyrlyq tanytty. Sol jeltoqsanda erlikpen qaza tapqan Qaırat, Sábıralarǵa Qazaqstanda ǵana emes, burynǵy odaqtas respýblıkalarda eskertkish ornatýǵa bolady. Óıtkeni Jeltoqsan oqıǵasy odaq kólemindegi keıingi tolqýlarǵa, ıaǵnı Táýelsizdikke jol ashty», dedi óz sózinde qazylar alqasynyń tóraǵasy, Qazaqstannyń Eńbek Eri, KSRO jáne Qazaqstannyń halyq ártisi Asanáli Áshimov.
Qazylar alqasynyń sheshimimen jáne uıymdastyrýshylardyń usynysymen barlyq qatysýshylarǵa 500 myń teńge kóleminde aqshalaı syılyq jáne Syrym Datuly atyndaǵy tósbelgi tabys etildi.
Aıtys barysynda birqatar jergilikti aqyndar QR Mádenıet jáne sport mınıstri Aqtoty Raıymqulovanyń alǵyshatymen marapattaldy. Sondaı-aq aıtystyń týyn kóterip júrgen batysqazaqstandyq aqyn, Qazaqstan Jazýshylar odaǵy BQO fılıalynyń tóraǵasy Baýyrjan Halıollaǵa da qurmet kórsetildi.