Oralda tatar halqynyń kórnekti aqynyna arnalǵan halyqaralyq konferentsııa ótti

ORAL. QazAqparat - Búgin Túrki akademııasy halyqaralyq uıymynyń (TWESCO) qoldaýymen Oral qalasynda tatar ádebıetiniń klassıgi, kórnekti aqyn Ǵabdolla Toqaıdyń 130 jyldyǵy men Oral qalasyna qonys aýdarǵanyna 120 jyl tolýyna oraı halyqaralyq ǵylymı-tájirıbelik konferentsııa bastaldy, dep habarlaıdy akademııanyń baspasóz qyzmeti.

«Tatar halqynyń uly aqyny Ǵabdolla Toqaıdyń ómiri men shyǵarmashylyǵyndaǵy Oral» taqyrybyndaǵy konferentsııanyń ashylý saltanatynda TWESCO basshysy Darhan Qydyráliniń arnaıy quttyqtaý sózin Akademııa ǵalym-hatshysy Amantaı Shárip oqyp berdi.

Erteń qorytyndylanatyn ǵylymı jıynda Qazaqstan men Reseıden kelgen ǵalymdar men zııaly qaýym ókilderi baıandamalar jasap, paıymdy pikirlerin ortaǵa salýda.

Aıta ketý kerek, 130 jyldyq mereıtoıy bıyl keńinen toılanyp júrgen kórnekti tatar aqynynyń tulǵa retinde qalyptasýynda Oral qalasynyń mańyzy zor. Tatarstannan 9 jasynda týystaryn panalap kelgen Toqaı 21 jasyna deıin Oral qalasynda ómir súredi. Osy kezeń aralyǵynda ol búkil túrki halqyna aqyn, aǵartýshy retinde tanylyp úlgergen edi.