Oralda «Tartynbaı sóıler asylmyn» atty jyrshy-termeshiler baıqaýy máresine jetti

<p>Oral qalasynda uly aqyn ári batyr Mahambet Ótemisulynyń 220 jyldyǵyna arnalǵan &laquo;Tartynbaı sóıler asylmyn...&raquo; atty aımaqtyq-respýblıkalyq jyrshy-termeshiler baıqaýy máresine jetti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

BQO ákimdigi, oblystyq mádenıet basqarmasynyń qoldaýymen Qadyr Myrza Álı atyndaǵy oblystyq mádenıet jáne óner ortalyǵy uıymdastyrǵan jyr saıysyna Qazaqstannyń batys óńirinen jáne Qyzylorda oblysynan jeti jas oryndaýshy qatysyp, baq synady.

Eki kezeńnen turǵan baıqaý barysynda jyrshy-termeshiler aldymen Mahambet Ótemisulyna arnaǵan jyr-tolǵaýyn oryndady. Sodan keıin Mahambettiń óz óleńderine kezek berildi.

Foto: Maqsat Tuıaq

Ekinshi kezeńde saıyskerler óz qalaýymen Jıembet Bartoǵashuly, Shernııaz Jarylǵasuly, Marabaı Quljabaıuly, Ábýbákir Kerderi, Sartaı Kóshkinshiuly, Qumar Ábýǵalıulynyń bir shyǵarmasyn qazylar alqasynyń talqysyna saldy.

Eń sońynda Yǵylman Shórekovtiń «Isataı-Mahambet» dastanynan úzindi oryndaldy.

Belgili jyraý, Qazaqstannyń eńbek sińirgen qaıratkeri Uljan Baıbosynova bastaǵan qazylar alqasynyń uıǵarymymen 1 mln teńgelik bas júldeni Qyzylorda oblysynan kelgen Nuraıym Ertalap jeńip aldy.

Foto: Maqsat Tuıaq

Aqtóbelik Baqyt Arystanǵalıeva birinshi (800 myń teńge), batysqazaqstandyq Sátjan Ǵalymjanov ekinshi (700 myń teńge) jáne taǵy bir qyzylordalyq Uldana Nurtýǵan úshinshi (500 myń teńge) orynǵa ıe boldy.

Mańǵystaý oblysynyń ókili Aısultan Esenǵalıev Mahambet Ótemisuly, atyraýlyq Amanjol Daýylbaev Isataı Taımanuly atyndaǵy arnaıy júldemen (220 myń teńgeden) marapattaldy.

Foto: Maqsat Tuıaq

Batysqazaqstandyq Temirlan Ákimjanov kásipker Ermek Málikuly tikken arnaıy júldeni (200 myń teńge) qanjyǵasyna baılady.

Qazylar alqasynyń múshesi, halyqaralyq, respýblıkalyq jyrshy-termeshiler konkýrstarynyń laýreaty Farhat Orazovtyń aıtýynsha, Mahambettiń 220 jyldyǵyna arnalǵan baıqaý joǵary deńgeıde ótti.

«Qatysýshylar tyńǵylyqty daıyndalyp kelgen. Olardyń bári de jas, óz deńgeıleriniń ósip kele jatqandyǵyn tanyta bildi. Ásirese, Mahambet jyrlaryn ár túrli maqammen oryndaǵany óte jaqsy áser etti. Yǵylman Shórekovtiń „Isataı-Mahambet“ tarıhı dastanynan úzindi buǵan deıin Oralda jyrlanbaǵan eken. Bul da úılesim taýyp, Isataı men Mahambettiń qazaqtyń azattyq jolyndaǵy kúresin áıgilep turdy», — dedi F.Orazov. 

Foto: Maqsat Tuıaq