Oralda Stalıngrad soǵysy týraly fılmder kórsetildi

ORAL. QazAqparat - Oraldaǵy ıÝ.Gagarın atyndaǵy kınoteatrda Stalıngrad shaıqasynyń aıaqtalýyna 74 jyl tolýyna oraı shahar mektepteriniń oqýshylaryna «Saıqyn. Orda. Shtat qysqartý» jáne «Jánibek. Soǵys izderi» atty derekti fılmder kórsetildi, dep habarlaıdy «QazAqparat» HAA tilshisi.

Atalǵan fılmderdiń stsenarııin jazǵan jáne aýdarǵan teatr qaıratkeri Qujyrǵalı Tóleýishevtiń aıtýynsha, óńirge tanymal kásipker, ultjandy azamat Murat Jákibaevtyń prodıýserlik ortalyǵy osy kezge deıin Uly Otan soǵysyna Batys Qazaqstan oblysynyń qatysy, maıdandaǵy erlik pen tyldaǵy eńbek jóninde barlyǵy 17 fılm túsirgen bolatyn. Sonyń ekeýi Stalıngrad shaıqasyna arnalǵan edi. Stalıngrad maıdany tıip turǵandyqtan, BQO-nyń Orda (qazirgi Bókeı ordasy) jáne Jánibek aýdandary soǵys jaǵdaıynda dep jarııalanǵan bolatyn. Sondyqtan osy tóńirektegi aýyl-aımaqqa soǵys ákelgen zardap az bolǵan joq. Ásirese, temir jol boıyndaǵy Saıqyn, Jánibek, Shońaı stansalary jıi bombalaýǵa ushyrady. Fılm túsirý kezinde kózi tiri kýágerler sol qasiretti kezeń týraly áńgimelep berdi. 

 

Shara barysynda sondaı-aq «SAYAT» etnotýrıstik ortalyǵy» JShS dırektory, ólketanýshy Aıbolat Qurymbaev, tarıh ǵylymdarynyń kandıdaty Baqtyly Boranbaeva Uly Jeńiske batysqazaqstandyqtardyń mol úles qosqandyǵyn aıtyp, aǵa býyn qaharmandyǵyn keıingi urpaq umytpaýy tıistigin atap ótti.

«Óńir tarıhyna qatysty taǵy da fılmder túsirý oıda bar. Bári de qarjyǵa baılanysty. Sonymen qatar Oral qalasy tóńireginde balalardy atpen serýendetýge arnalǵan «SAYAT» etnotýrıstik ortalyǵy qurylyp jatqanyn aıta ketkim keledi. Jas urpaq atqa minip, óz ólkesin tanyp-bilip ósse deımiz», dedi «QazAqparat» tilshisine Q.Tóleýishev.